«Mektepke jol» aksııasy: Jan-jaqty qamqorlyq kórsetiledi

О́ńirde «Balalarǵa birlesip kómekteseıik!» uranymen ótip jatqan «Mektepke jol» jalpy respýblıkalyq aksııasynyń ótýi jaıly suraǵanymyzda oblystyq bilim basqarmasynyń kámelettik jasqa tolmaǵandar, jetim jáne ata-anasynyń qamqorlyǵynsyz qalǵan balalardyń quqyqtaryn qorǵaý bóliminiń bas mamany Aıgúl OSPANOVA bylaı jaýap berdi: – Jańa oqý jylynda 70 myńnan astam oqýshy óz bilimderin odan ári jalǵas­tyrady. Olardyń 9 myńǵa jýyǵy turmysy tómen jáne kóp balaly otbasylardan bolsa, 700-deıi jetim jáne ata-ana­nyń qamqorlyǵynsyz qalǵandar ­sanatynan. Keshendi júrgizilgen reıdter kezinde ishki ister bólimderinde esepte turǵan ata-analardyń balalaryna basa nazar aýdarylyp, mektepke barýdan bas tartqan 10 oqýshy anyqtaldy. Olardy qaltaly azamattar keńse taýarlarymen, sport kıimderimen qamtamasyz etti. Ár aýdan boıynsha az qamtylǵan otbasylardyń sany belgilenip, sharýashylyqtarǵa bekitilip berildi. Birinshi qyrkúıekke deıin 4500 oqýshyǵa jergilikti qazyna, 7600 oqýshyǵa bıýdjetten tys kiris esebinen 50 mıllıon teńgeniń kómegin berý josparlanǵan. Oblys ákiminiń orynbasary Anarhan Dúısenovanyń jetekshiligimen ótken uıymdastyrý komıtetiniń taıaýdaǵy májilisinde qosymsha sheshimder qabyldanyp, aýyldyq jerlerge erekshe kóńil bólý mindetteri júkteldi. «Mektepke jol» aksııa­sy aıasyndaǵy jaqsy bastama­lar jan-jaqty qoldaý taýyp­ keledi. Solardyń birine Petro­pavl qalasynyń ákimi Marat Tasmaǵambetovtiń Save­levter otbasyna 70 myń teń­geniń mate­rıaldyq qol ushyn bergenin aı­týǵa bolady. Tilderdi damytý, mal dárigerlik, tabıǵat resýrs­tary jáne tabıǵat retteý bas­qarmalary da ózderi qamqor­lyqqa alǵan oqýshylarǵa keńse taýarlaryn jetkilikti túrde satyp áperdi. Mundaı mysaldar kóp. Sharanyń alǵashqy keze­ńinde turmysy tómen otba­sylar­dyń 171 balasyna 791 myń teńge­niń materıaldyq kómegi berildi. О́zekti máselelerdiń biri – qa­jetti oqýlyqtarmen, oqý qural­­­­darymen jetkilikti qamtý. Búgin­de mektep­terden oqýlyq­tarǵa qatysty ótinishter qabyl­danyp, bul maqsat úshin jergilikti qazy­nadan 400 mıllıon teńge qaras­tyrylǵan. Osynsha qarajatqa jańa oqýlyqtar alynyp, tegin taratylatyn bolady. О́tken jylǵydaı bıyl da oqýshylardy oqýlyqtarmen tolyq qamtamasyz etýdiń barlyq múmkindikteri qarastyrylǵan. Bul jónindegi shara úsh kezeńge bólinip – «Kitap qoryn tekser!», «Mektep oqýly­ǵy», «Syılyqqa – oqýlyq!» ataý­la­ryn ıelengen. Osyǵan oraı bilim berý bólimderi boıynsha kitap qorlary tekserilip, monı­torıng júrgizildi. Onyń barysynda mektepter arasynda oqý quraldarymen almasý joldary belgilendi. Sol sııaqty oqýshylardyń qoldanystaǵy kitaptaryn uqyptap ustap, ózinen keıingi ini-qaryndastaryna syı­laý, mektepke janashyr demeýshi­lerdi, úkimettik emes uıymdardyń ókilderin keńinen tartý sharalary kózdelgen. Jańa oqý jylynyń alǵash­qy kúni birinshi synyp oqý­shylaryna Qazaqstan Respýb­lıkasynyń Prezıdenti Nur­sultan Nazarbaevtyń atynan «Meniń Otanym – Qazaqstan» atty kitaby syıǵa tartylmaq. Bilim kúni Elbasynyń atynan tabystalatyn bul kitapqa mektep tabaldyryǵyn tuńǵysh att­a­ǵaly otyrǵan 8 myńnan astam sol­tústikqazaqstandyq ıe bolady. Áńgimelesken О́mir ESQALI, «Egemen Qazaqstan». Soltústik Qazaqstan oblysy.