Soltústik Qazaqstanda «Polısııa barysy-2015» týrnıri bastaldy

PETROPAVL. 27 aqpan. Soltústik Qazaqstan oblysyndaǵy «Jeńis» balalar jáne jasóspirimder sport mektebinde qazaq kúresinen « Polısııa barysy» týrnıri bastaldy. Bul týraly oblystyq ishki ister departamentiniń baspasóz qyzmeti habarlady. Týrnırdiń ashylýyna oblys ákiminiń orynbasary Anarhan Dúısenova, qala ákimi Marat Tasmaǵanbetov jáne kúshtik qurylymdar basshylary qatysty. Jarys barysynda oblystyq ishki ister departamentiniń basshysy, general-maıor Berik Bilálov sport ardageri Baýyrjan Quljanovqa «Qazaq kúresi boıynsha birinshi sport sheberi» belgisin saltanatty jaǵdaıda tapsyrdy. «Tuńǵysh ret uıymdastyrylyp otyrǵan jarysqa oblys ortalyǵynan, aýdandardan jáne qylmystyq atqarý, tótenshe jaǵdaılar jónindegi departamentter men mamandandyrylǵan kúzet basqarmasynan 34 palýan kúsh synasyp, «Polısııa barysy-2015» ataǵyn sarapqa salatyn bolady», deıdi týrnırdi uıymdastyrýshylar. Jeńimpazdar men júldegerler laıyqty marapattalmaq. Al «Polısııa barysyn» qomaqty júlde kútip tur. О́mir Esqalı. Derekkóz: Soltústik Qazaqstan oblystyq ishki ister departamentiniń baspasóz qyzmeti. Sýret: ogni.kz.