Foto: Ashyq derekkóz
Sońǵy jyldary qys mezgilindegi muz massalary men qatty jelden kóterilgen tolqyndar jaǵalaýdy shaıyp, demalys oryndaryna qaýip tóndirgen. Osyǵan baılanysty oblys ákimdigi Alakól jaǵalaýynyń 13 shaqyrym aýmaǵyn qamtıtyn qorǵanys jobasyn qolǵa aldy. Qazir Kóktuma aýylynda 960 metr, Aqshı aýylynda 200 metr jaǵalaý bekitilgen. Joba tolyq aıaqtalǵan soń bul aýmaqtar zamanaýı qoǵamdyq jaǵajaıǵa aınalady.
Injenerlik ınfraqurylym da kezeń-kezeńimen jańartylyp keledi. Aqshı aýylynda 69 shaqyrym káriz jelisiniń qurylysy tolyq aıaqtalǵan. Sonymen birge Aqshı men Kóktuma aýyldarynan shyǵatyn aǵyn sýlardy qabyldap, tazartatyn zamanaýı tazartý qondyrǵysy salynyp jatyr. Nysannyń qýaty táýligine 6500 tekshe metrdi quraıdy.
Bıylǵy maýsymda týrısterdiń jaılylyǵy úshin jaǵalaýǵa qosymsha 100 qoqys konteıneri, 40 kıim aýystyratyn oryn, 40 bıodárethana, 40 qutqarý munarasy, 13 shaqyrym býı jelisi jáne 8 pırs ornatylady. Sonymen qatar Beskól men Aqshı aýyldary arasynda 57 shaqyrym elektr jelisi men 2 qosalqy stansııa iske qosylǵan.
Tazalyq máselesine de erekshe kóńil bólinip otyr. Osy maqsatta arnaıy «Alakól Tazalyq» kommýnaldyq memlekettik mekemesi qurylyp, onyń materıaldyq-tehnıkalyq bazasy 21 birlik arnaıy tehnıkamen tolyqtyrylǵan. Endi kól jaǵalaýyndaǵy qoqysty shyǵarý, qoǵamdyq aýmaqtardy tazalaý, jaǵajaılardy kútip ustaý jáne sanıtarlyq baqylaý jumystary turaqty túrde júrgiziledi. Jaǵalaýda maýsymdyq brıgadalar kún saıyn jumys istep, konteınerlerdiń ýaqytyly bosatylýy men demalys oryndarynyń tazalyǵyn qadaǵalaıdy.
Alakól aýdanynyń ákimi Almas Abdınovtyń aıtýynsha, týrıster sany artqan saıyn qyzmet kórsetý sapasy da jaqsaryp keledi.
«Alakólge keletin týrısterdiń sany artyp jatqandyqtan, biz jaǵalaýdaǵy qyzmet kórsetý sapasyn da únemi jaqsartyp kelemiz. Bıyl “Alakól Tazalyq” mekemesi qurylyp, tazalyq jumystary bir júıege tústi. Jaǵalaýdaǵy kıim aýystyratyn dúngirshekter sany kóbeıtildi. Qosymsha sanıtarlyq nysandar ornatylyp jatyr. Eń bastysy – Alakól jaǵalaýy jyl saıyn jańaryp, demalýshylarǵa qolaıly ári qaýipsiz aımaqqa aınalyp keledi. Bul jumystar aldaǵy ýaqytta da jalǵasady», dedi aýdan ákimi.
Alakólge jetý de jeńildegen. Jalpy uzyndyǵy 488 shaqyrym bolatyn Taldyqorǵan – Úsharal jáne Úsharal – Dostyq avtomobıl joldary jańǵyrtylyp, kólik qatynasy jaqsarǵan. Úsharal áýejaıynyń ushý-qoný jolaǵy jóndelip, iri áýe kemelerin qabyldaýǵa múmkindik jasaldy. Sonymen qatar Astana, Almaty, О́skemen, Semeı, Pavlodar jáne Qyzylorda qalalarynan Alakól baǵytyna 12 poıyz qatynaıdy.
Alakól men Balqash týrızmi: Memleket basshysy Jetisý oblysynyń ákimine birqatar tapsyrma berdi
Qaýipsizdik sharalary da kúsheıtilgen. Aqshı aýylyndaǵy qutqarý bólimshesinde 13 qutqarýshy men 11 motorly qaıyq táýlik boıy kezekshilik etedi. Jazǵy maýsymda kól jaǵalaýynda 50 polısııa qyzmetkeri jumys isteıdi. Qoǵamdyq tártip drondar men 39 beınebaqylaý kamerasy arqyly baqylanady. Aqshı men Kóktuma aýyldaryndaǵy dárigerlik ambýlatorııalar táýlik boıy qyzmet kórsetedi.
Qazir Alakól jaǵalaýynda 277 týrıstik nysan jumys isteıdi. Tek 2025 jyldyń ózinde 17 jańa týrıstik nysan paıdalanýǵa berilgen.
