Foto: ashyq derekkóz
Depýtat jańa zań jobasy kópshiliktiń jyldar boıy kezigip kelgen naqty máselelerine berilgen jaýap dep esepteıdi. Sondaı-aq ol qujattaǵy ár baǵytty sanamalap berdi.
«Skrınıng – jumys berýshiniń esebinen. Kóbi jalaqydan qaǵylmaý úshin arnaıy skrınıngke barýǵa qorqady. Jumys berýshi sizdi ortasha jalaqyńyzdy saqtaı otyryp, 3 kúnge deıin skrınıngke jiberýge mindetti. Endi eGov nemese SMS arqyly «tekseriletin ýaqyt keldi» dep habarlama keledi. Al kadr qyzmeti qyzmetkerdi skrınıngke jiberýi tıis. «Bilmedim» nemese «jibermedi» degen syltaý endi júrmeıdi. Bolmasa – jaýapkershilik. Biz másele kótersek, ony zańdaǵy naqty normalar arqyly sheshemiz», dedi Ashat Aımaǵambetov.
Jańa zań jobasy: Aýyl bıýdjetterin ulǵaıtýǵa jańa salyqtyq tetikter usynyldy
Halyq qalaýlysy sondaı-aq júrgizýshiler men zaýyt jumysshylarynyń aýysym aldyndaǵy tekseris ýaqytyna aqy tólený máselesin kótergen.
«Eger aýysym aldyndaǵy tekserý mindetti bolsa – demek, ol jumys ýaqyty. Ol esepke alynyp, tólenýi tıis. Bul norma kásiporyndardy prosesti avtomattandyrýǵa stımýl bolady, áıtpese kezekte turǵan ár saǵat úshin aqy tóleýge týra keledi», deıdi depýtat.
Depýtattyń aıtýynsha, jumys berýshi jumysqa qabyldaýdan bas tartsa, onda jazbasha jaýapty talap etýge múmkindik bar. Bul qaǵazben eńbek ınspeksııasyna nemese sotqa senimdi túrde barýǵa bolady.
Sonymen qatar qujatta adamnyń ar-namysy men abyroıyn zańmen qorǵaý bekitilgen.
«Biz alǵash ret Eńbek kodeksinde qyzmetkerdiń ar-namysyn, qadir-qasıetin qurmetteý jáne jeke ómirine qol suǵylmaý quqyǵyn bekittik. Basshylyq tarapynan dórekilik, býllıng nemese jeke isterge aralasý – endi zańdy tikeleı buzý bolyp sanalady», dep jazdy depýtat.
Zań jobasynda munan ózge qyzmetkerdi jumystan bosatarda onyń qateligin saralaý, jumystan ketý sheshimin qabyldaǵan azamatty ártúrli syltaýmen ustap otyrý zańǵa qaıshy ekeni naqtylanǵan. Sonymen qatar aýyryp júrgende eńbek shartynyń merzimi aıaqtalǵanymen, ony aýrýhana paraǵy aıaqtalǵansha uzartý, jalaqy, grafık, jumys orny sekildi kez kelgen ózgeris tek jazbasha nemese ESP arqyly jáne 15 jumys kúninen keshiktirilmeı habarlanýy tıis ekeni jazylǵan. Oǵan qosa densaýlyq jaǵdaıyna baılanysty shyǵynsyz aýysý máselesi de qaralǵan.
