О́ristegini Qarynbaıdyń malyndaı kóredi

Qazaq amandasqanda: «mal-jan aman ba?» deıdi. Mal – baılyq, otba­synyń azyǵy. Minse  – kólik, ishse  – sýsyn, kıse – kıimi. Sondyqtan da «mal ashýy – jan ashýy» deıdi. Saryaǵash aýdanynyń tur­ǵyndary ótken jyldyń jeltoqsany men naýryz aıynyń aralyǵynda urlanǵan malyn taýyp berýdi ótinip aýdandyq polısııa bólimine 10 ret aryz jazǵan. Urylar jaıylymnan toqty-torym emes, jylqylar men múıizdi iri qarany alyp kete beredi eken. Oblystyq ishki ister bas­qarmasynyń qyzmetkerleri jedel izdestirý is-sharasy barysynda bireýdiń aq adal malyn ózinikindeı kórip, óristen urlap júrgen bir top ardan bezgenderdi ustady. Jaý alystan kelmepti. Saryaǵash pen Qazyǵurt aýdandary aýma­ǵynda jarty jyldan astam ýaqyt joǵarydaǵydaı kásippen aınalysqan qylmystyq toptyń serkesi 50 jastaǵy osy óńirdiń azamaty bolyp shyqty. Ol buǵan deıin birneshe márte mal urlyǵymen sotty bolǵan, bótenniń malyn óz dúnıesindeı kóretin sabaz eken. Aýyzy pispeıdi. Medıasııa degen aǵaıynǵa jaqsy boldy. Qolǵa tússe deldal bıdi aparyp, basy salbyrap keshirim suraǵan bolady. Qunyn tólep beredi. Bylaı shyǵa bere bárin sypyra bir balaǵattap, atyna yrǵyp minedi. Boı tasalap óristi shalady. Jaıylyp júrgen maldyń jerin belgilep ketedi. Mundaı urylar Saryaǵash jáne Qazyǵurt aýdanynyń týmalary. 7 kúdikti anyqtalyp, 6-ýy qolǵa tústi. Bulardyń urlyq joldary bireý. Kúndiz ıesiz júrgen maldardyń turǵanyn baıqastaıdy da, túnde jasyrýly júk mashınasyna aıdap aparyp toǵytady. Sodan ózderi biletin tasa jerge aparyp, soıatynyn soıyp bazarǵa arzan baǵamen ótkizedi. Ázirge olardyń 11 ret mal urlyǵy jaıyna qatystylyǵy anyqtalǵan. О́risten 70 bas jylqy men iri qara aıdap áketken olar mal ıelerine 20 mln. teńgeden astam shyǵyn keltirgen. Polısııa urlanǵan maldardyń jartysy men tasymalǵa paıdalanyp kelgen eki «KamAZ» mashınasyn tárkiledi. «Qylmystylar jazasyn alsa eken», – deıdi ashynǵan jurt. Baqtııar TAIJAN, «Egemen Qazaqstan». Ońtústik Qazaqstan oblysy.