Chempıondar lıgasy. Búgingi «Astana» – APOEL oıynyn «Tań» telearnasy kórsetedi

ASTANA. 18 tamyz. Búgin «Astana» ÝEFA Chempıondar lıgasy irikteý týrnıriniń pleı-off básekesindegi alǵashqy oıynyn oınaıdy. Qarsylasy Kıprdiń APOEL komandasy. «Astana Arena» sport kesheninde bolatyn match jergilikti ýaqytpen saǵat 22:00-de bastalady. Bul týraly egemen.kz habarlady. Oıyndy «Tań» telearnasy tikeleı efırde kórsetedi dep kútilýde. Osy rette, «Tań» Chempıondar lıgasy men Eýropa lıgasynyń 2015-2016 jylǵy maýsymdaǵy oıyndaryn tikeleı efırde kórsetý quqyǵyna ıe elimizdegi jalǵyz telearna ekenin aıta keteıik. APOEL eýrokýboktyq týrnırlerge 1963-1964 jylǵy maýsymnan beri qatysyp kele jatqan tájirıbeli komanda. Chempıondar lıgasynda irikteý synyndaǵy oıyndardy qosqanda 66 match ótkizgen. Onyń 19-ynda jeńiske jetse, 18 kezdesýdi teń aıaqtaǵan. Al 29 oıynda qarsylastaryna ese jibergen. Kıprdiń komandasy 2011-2012 jylǵy maýsymda Chempıondar lıgasynyń toptyq kezeńine shyǵyp qana qoımaı, dodanyń shırek fınalyna deıin jetip, jankúıerlerdiń nazaryn aýdarǵan ujym. О́z kezeginde «Astana» bul týrnırdiń debıýtanty bolyp sanalady. Sebebi, 2009 jyly ǵana qurylǵan klýb bıylǵa deıin Chempıondar lıgasynda oınaǵan joq. Komandanyń kári qurlyqtaǵy eń joǵary nátıjesi Eýropa lıgasy irikteý týrnıriniń pleı-off satysy. Bul synda «Astana» ótken maýsymda óner kórsetken edi. Elordalyqtardyń jolyna ol kezde Ispanııanyń «Vılıareal» komandasy tosqaýyl boldy. Mamandardyń aıtýynsha, búgingi oıynda «Astana» sál ǵana basymdyqqa ıe. Keıbir býkmekerlik keńselerdiń pikirine súıensek, bizdiń klýb 1:0 esebimen jeńiske jetedi. Aıta keteıik, osy oıynǵa «Astananyń» shabýylshysy Patrık Tvýması qatysa almaıdy. Ol HIK-ke qarsy qarymta kezdesýde qyzyl qaǵaz alyp, alańnan qýylǵan bolatyn. Degenmen, otandyq jankúıerler bolgar mamany Stanımır Stoılovtan tálim alatyn «Astana» oıynshylarynyń jeńisine senetinin áleýmettik jeliler arqyly bildirýde. Astana qalasy ákimdiginiń habarlaýynsha, matchty stadıonnan 30 myńǵa jýyq jankúıer tamashalaıdy. «Astana» men APOEL arasyndaǵy oıynǵa vengr mamany Vıktor Kashshaı tórelik jasaıdy. Elaman Qońyr. Derek: egemen.kz. Sýret: 24.kz.