Jarys jolynda qalǵan jalǵyz tennısshimiz Anna Danılına serbııalyq Aleksandra Krýnıchpen birge «Rolan Garrostyń» jartylaı fınalyna joldama aldy. Keshe olar aýstralııalyq Ellen Peres pen nıderlandyq Demı Shıýrske 6:2, 7:6 esebimen san soqtyrdy. Jastar saıysynda Zańǵar Nurlanulynyń joly bolmady. Bastapqy básekelerde qarsylastaryn qapy qaldyrǵan qandasymyz 1/8 fınalda brazılııalyq Leonardo Shtork Franktan utyldy – 3:6, 7:6, 5:7.
World Boxing federasııasy álemdik reıtıngti jańartty. Búginde elimizdiń tórt boksshysy óz salmaq dárejelerinde úzdik dep tanylyp otyr. Olar – Sanjar Táshkenbaı (50 kg), Mahmud Sabyrhan (55 kg), Tórehan Sabyrhan (70 kg), Aıbek Oralbaı (+90 kg). О́zge jýan judyryqty jigitterimiz mynadaı satylarǵa jaıǵasty: Aıbek Oralbaı (80 kg) – 2, Orazbek Asylqulov (60 kg), Sabyrjan Aqqalyqov (75 kg) – 3, Saǵyndyq Toǵambaı (90 kg) – 6, Ertýǵan Zeınýllınov (55 kg) – 7-oryn. Qalǵan alty salmaqtyń tizgini Ábdýmálik Halokov (60 kg), Asadhýja Mýıdınhýjaev (65 kg), Fazlıddın Erkınboev (75 kg), Javohır Ýmmatalıev (80 kg), Aqmaljon Isroılov (85 kg), Turabek Habıbýllaev (90 kg) syndy ózbek órenderiniń qolynda.
16-22 maýsym kúnderi Qytaıda shahmattyń rapıd pen blıs túrlerinen ótetin komandalyq álem chempıonatyna elimizdiń «KazChess» klýby qatysady. Komanda sapynda bizdiń Bıbisara Asaýbaeva men Qazybek Nógerbekten bólek, ázerbaıjandyq Shahrııar Mamedıarov, reseılik Aleksandr Grıshýk, majarstandyq Rıhard Rapport, qytaılyq Van Hao syndy legıonerler de óner kórsetedi. Jarystyń júlde qory – 500 000 eýro.
Elimizdiń tanymal aralas jekpe-jek sheberleri – Azat Maqsum (15-3) men Jasulan Ákimjan (11-4) Sheshenstannyń ASA promoýshenimen kelisimshartqa otyrdy.
Álemdegi eń ádemi tennısshi qyzdardyń tizimi jarııalandy. Sulýlar reıtınginde bizdiń Elena Rybakına da bar. Elimizdiń birinshi raketkasyna 11-oryn buıyrypty. Kóriktilerdiń alǵashqy ondyǵyna myna oıynshylar endi: Anna Kýrnıkova men Marııa Sharapova (Reseı), Ana Ivanovıch (Serbııa), Anna Kalınskaıa (Reseı), Gabrıela Sabatını (Argentına), Krıs Evert (AQSh), Emma Radýkaný (Ulybrıtanııa), Ejenı Býshar (Kanada), Karolın Voznıaskı (Danııa), Paýla Badosa (Ispanııa).
Daıyndaǵan –
Ǵalym SÚLEIMEN,
«Egemen Qazaqstan»
