Keıingi jyldary elimizde buqaralyq sportty damytýǵa erekshe kóńil bólinip keledi. Memleket basshysy Qasym-Jomart Toqaev óz Joldaýlarynda halyqtyń sportpen júıeli aınalysýyna jaǵdaı jasaý deni saý ult qalyptastyrýdyń basty alǵysharttarynyń biri ekenin aıtty. Osy baǵyttaǵy jumystar óńirlerde naqty jobalar arqyly júzege asyrylyp jatyr. Aqjar aýylynda boı kótergen jańa keshen sonyń jarqyn mysaly. Jalpy aýmaǵy 1200 sharshy metrden asatyn nysan tolyq zamanaýı talaptarǵa saı jabdyqtalǵan. Bir aýysymda 47 adamǵa deıin qabyldaı alatyn keshende sportshylar men aýyl turǵyndarynyń alańsyz jattyǵýyna barlyq jaǵdaı jasalǵan.
Saltanatty is-sharaǵa arnaıy barǵan oblys ákimi jańa nysannyń aýdan jastary úshin mańyzy zor ekenin atap ótti.
– Memleket basshysynyń tapsyrmasymen oblysymyzda buqaralyq sport júıeli túrde damyp keledi. Tarbaǵataı degende eń aldymen aýdandaǵy saıdyń tasyndaı voleıbolshylary eske túsedi. Jańa keshende tek voleıbol ǵana emes, ózge de sport túrlerinen kók týymyzdy kókte jelbireter chempıondar shyǵady dep senemin, – dedi óńir basshysy Nurymbet Saqtaǵanov.
Oblys ákimi sport mekemesine shaǵyn avtobýstyń sertıfıkatyn tabys etti.
Bul Tarbaǵataı aýdanynda el ıgiligine berilip otyrǵan ekinshi iri sport nysany. Keshende basketbol, voleıbol, shaǵyn fýtbol, tennıs, badmınton, boks, qazaq kúresi, aýyr atletıka sekildi sport túrlerimen aınalysýǵa múmkindik bar. Barlyq zaldar qajetti qural-jabdyqtarmen tolyq qamtamasyz etilgen. Sportshylardyń qolaılylyǵy úshin jýyný, kıim aýystyrý bólmeleri, dáriger kabıneti, jattyqtyrýshylarǵa arnalǵan bólmeler qarastyrylǵan. Bul óz kezeginde jattyǵý úderisiniń sapaly ári qaýipsiz uıymdastyrylýyna múmkindik beredi.
Tarbaǵataı aýdany ejelden sporttyq dástúri qalyptasqan óńirlerdiń biri. Ásirese aýdan voleıbol mektebimen respýblıka kóleminde tanymal. Jergilikti sportshylar san márte oblystyq, respýblıkalyq jarystarda top jaryp, aýdandy tanytyp keledi. Sondyqtan jańa sport kesheniniń ashylýy aýdan jastaryna tyń múmkindikterge jol ashady.
Mamandardyń aıtýynsha, aýyldyq jerlerde sport ınfraqurylymyn damytý jastardyń bos ýaqytyn tıimdi uıymdastyrýǵa, salamatty ómir saltyn qalyptastyrýǵa, buqaralyq sportty keńinen damytýǵa yqpal etedi. Sonymen qatar mundaı nysandar talantty sportshylardy anyqtap, olardyń kásibı deńgeıde ósýine jaǵdaı jasaıdy.
Ashylý rásiminen keıin Aqjar aýylynda ardager kókparshylar arasynda aýdanaralyq ashyq týrnır ótti. Dúbirli dodaǵa Tarbaǵataı, Ulan, Zaısan, Kúrshim, Samar aýdandarynan kelgen 50 jastan asqan ardager kókparshylar qatysty. Ár komanda quramynda 12 sportshydan óner kórsetti. Jarystyń ereksheligi sol, jas býyn emes, ulttyq sporttyń bıik belesin baǵyndyrǵan tájirıbeli shabandozdar baq synady.
Jalpy, ulttyq sport túrlerin damytý memlekettik deńgeıdegi mańyzdy mindetterdiń birine aınalǵany belgili. Keıingi jyldary elimizdiń túkpir-túkpirinde kókpar, báıge, aýdaryspaq, teńge ilý sııaqty ulttyq sport túrlerine qyzyǵýshylyq artyp keledi. Bul úrdis jastardyń tarıhı tamyryna qaıta bet burýyna yqpal etip jatyr. Aqjardaǵy týrnırdiń negizgi maqsaty da osy – ulttyq qundylyqtardy dáripteý, jastardy sportqa baýlý, salamatty ómir saltyn nasıhattaý. Jarysta jankúıerler tartysty básekeniń kýási boldy. At ústindegi aıla-tásil, shapshańdyq pen tájirıbe ushtasqan saıys ulttyq sporttyń ómirsheńdigin taǵy bir márte dáleldedi.
Shyǵys Qazaqstan oblysy,
Tarbaǵataı aýdany
