Anastasııanyń jasy 32-de. Jetimder úıinde tárbıelengen názik qyz jastaıynan taǵdyr taýqymetin bastan keshirdi. Basynda baspanasy, janynda kómektesetin birde-bir jaqyn týysy joq ol muńǵa jıi batyp, qıyndyqtan shyǵatyn joldy izdeıtin. Qaryzǵa batyp alǵan páteriniń qunyn tóleý qorqynyshqa aınaldy. Onsyz da az jalaqysy iship-jeminen artylmaıtyn. Birde Nastıa Instagram-daǵy paraqshasynda aınalasyndaǵy meıirban adamdar kórer, estir degen úmitpen óziniń armany jaıynda baıandady. Nebári 5 myńdaı ǵana jazylýshysy bar onyń bul beınerolıgi sol sátte ǵalamtordy sharlap, myńdaǵan adamǵa tarap ketetinin kim bilgen.
«Eger tym bolmaǵanda 30 myń adam 200 teńgeden aýdarsa, jeke páterim bolar edi. Men álemge, ondaǵy adamdardyń sheksiz meıirbandyǵyna senemin», degen sózderi myńdaǵan júrekti jylytqany anyq edi. Beınerolık jarııalanǵan sátten bastap múlde beıtanys adamdar onyń esepshotyna aqsha aýdara bastaǵan. Arada táýlik ótkende Anastasııanyń shotynda bir páterdiń qunyna jetetin aqsha jınalady.
– О́mirimde mundaı tańǵajaıyp oqıǵa bolǵanyna áli kúnge sene alar emespin. Áý basta bankten májbúrli túrde aqshalaı nesıe rásimdegen edim. Oǵan quny 5,5 mln teńge turatyn, aýmaǵy 20,5 sharshy metr bir bólmeli shaǵyn páter satyp aldym. Al otandastarym bir táýlik ishinde 8 mln teńgeden astam qarajat jıyp beredi dep kim oılaǵan? Jınalǵan aqshamen bankten alǵan nesıemdi, ıaǵnı úıdiń qunyn tolyqtaı ótedim. Qalǵan qarajattyń bir bóligin páterimdi jóndeýge jumsap jatyrmyn. Sondaı-aq anam men ájemniń zırattarynyń basyndaǵy eskertkishterin jańalasam deımin. Maǵan osy kúnderi kómek surap habarlasqandar bar. Qaterli dertke shaldyqqan eki adamǵa qarajat aýdardym. Adamdar maǵan áli kúnge aqsha aýdarýlaryn qoıar emes. Sondyqtan aqsha jınaýdy toqtattym. Kómek kórsetken adamdarǵa alǵysym sheksiz. Meıirban jandardyń aınalamyzda kóp ekenine shyn máninde kóz jetkizdim. О́zimniń áli de ózgelerge kerek ekenimdi jan dúnıemmen sezindim, – dep tolǵandy Anastasııa.
Anastasııa 8 jasqa tolǵanda anasy aýyr dertten kóz jumyp, balalar úıine tárbıelenedi. Anasynyń ólimi janyna qatty batqan boıjetken uzaq jyldar psıhologııalyq kúızeliste júrgen. Degenmen ómirge qushtar qyz bilim alýǵa umtylyp, qatarlastarynyń aldy bolýǵa tyrysady. Áýeli jetim balalar men ata-anasynyń qamqorlyǵynsyz qalǵan balalarǵa arnalǵan №1 mektep-ınternatta, odan soń №2 mektep-ınternatta tárbıelendi. Mektepti támamdaǵannan keıin Aqsý qalasyndaǵy Jaıaý Musa atyndaǵy kópsalaly kolledjge oqýǵa túsip, rejısser mamandyǵyn alyp shyǵady. Sodan soń Reseıdiń Omby memlekettik ýnıversıtetine qujat tapsyryp, teatr jáne kıno akteri mamandyǵyn meńgergen.
– Kolledjde oqyp júrgende bastapqyda baspana máselesi asa qıyn boldy. Sol ýaqytta maǵan qamqorlyq tanytyp, óz úıinde turǵyzǵan ustazym Qaıyrjan Beısenbaevtyń kómegin áli kúnge umytpaımyn. Sodan sırk óneriniń bir túri – birneshe dopty bir ýaqytta qaqpaqyldaýdy úırenip aldym. Ol keıin Ombyda oqyp júrgende kúnkórisime qarajat tabýyma sep boldy. Kóshede turyp óner kórsetetinmin. Adamdar aqsha berip ketedi. Sóıtip, isher asyma, kıimime qajet aqsha taptym, – deıdi Anastasııa.
Omby ýnıversıtetin támamdap Pavlodarǵa oralǵan soń shahardaǵy Chehov atyndaǵy drama tearyna shaqyrý alady. Alǵashqy kezeńde kópshilik rólderdi somdap júrdi. «Dýbrovskıı» qoıylymynda rejısserlerdiń kózine túsip, «Tango na troıh» spektaklinde úı qyzmetshisiniń róli senip tapsyrylady. Keıin «Lıýbov ı golýbı», «Master ı Margarıta», taǵy basqa qoıylymdarda salmaqty rólderdi somdady. Búginde Nastıanyń akterlik sheberligi shyńdalyp, qalyptasý ústinde. Keıingi ýaqytta kıno kastıngterge qatysyp júr. Sonymen birge ıoga ónerin úırenip, ıoga jattyqtyrýshysy atanǵan.
Onyń aıtýynsha, meıirban adamdary kóp qoǵamnyń bolashaǵy zor. Memlekettik tildi mektep kezinde meńgermeı qalǵanyn ózine úlken kemshilik dep sanaıtynyn, aldaǵy ýaqytta qazaq tilin úırenýdi myqtap qolǵa alatynyn jetkizdi.
Pavlodar oblysy
