QOSTANAI. 29 maýsym. Qostanaı aýdanynyń ortalyǵy Zatobol kentinde 10 jasar ul balany ıt talap óltirdi. Bul týraly egemen.kz tilshisi habarlady.
Keshke balalarmen úıdiń mańaıynda oınap júrgen bala joǵalyp ketken, ony ata-anasy, týystary búkil kentti sharlap izdegen. Al onyń máıitin bir-eki kúnnen soń úıdiń artynda ǵana 100 metrge jetpeıtin jerden taýyp alǵan.
Sergeıdiń anasy Lıýbov Anatolevna: «Biz onyń júzin kóre almadyq, tabytqa salyp ákelgen kúıi jerleýge alyp ketti» dedi. Sergeıdiń otbasyna onyń máıitin taýyp alǵan polıseıler balany ıt talap óltirgeni týraly ǵana aıtqan. Onyń búge-shigesin týraly úndemegen. Onyń qalaı bolǵanyn balanyń ata-anasy, týystary onsyz da baǵamdaǵan. Turǵyn úılerdiń mańaıynan Elena Týkpkalo degen áıel «Azııa-vek» jaýapkershiligi shekteýli seriktestiginen jer jalǵa alǵan. Onda ustaǵan ıtter baılanbaı, bos jiberilgen. Oıyn balasynyń ol jerge qalaı baryp qalǵany belgisiz. Balanyń máıitin taýyp alǵannan keıin, ıtter atyp tastalǵan.
Sergeıdiń anasy Lıýbov Anatolevna: «Meniń ulym múgedek, ortalyq nerv júıesi zaqymdanǵan. Ol qoryqqan kezde kógerip ketetin, dybysy shyqpaı qalatyn. Ol ıt talaǵan kezde aıqaılap, habar bere almaǵan. Áıtpese jan balasy estir edi ǵoı» deıdi. Qazir ol sotqa deıin anyqtaý jumystary júrip jatyr.
Názıra Járimbetova.
Derek, sýret: kstnews.kz
