Premer-lıga: ekinshi aınalym bastaldy

О́tken aptada fýtboldan Qazaqstan premer-lıgasynyń ekinshi aınalymy bastaldy. Sonyń sheńberinde komandalar 23-týr oıyndaryn oınady. Týr barysynda jan­kúıerler «Astana» men «Qaırat» klýbtarynyń qatysýymen bolǵan oıyn­darǵa erekshe nazar aýdardy. Onyń sebebi, qos jasaq ta eýrokýboktyq báse­kelerde sátti oınaýda. Atap aıtqanda, búgin elordalyqtar Chempıondar lıgasy irikteý týrnıriniń pleı-off básekesinde al­ǵashqy kezdesýin ótkizse, «Qaırat» 20 tamyzda Eýropa lıgasynyń atalǵan synynda baq synaıdy. Ekinshi aınalymdy «As­tana» jeńispen bastady. Syrt alańda «Aqtóbeden» 1:0 esebimen basym túsken elordalyqtar 25 upaımen týrnır kestesinde jeke-dara kósh bastady. Al «Qaırat» Shymkentte «Ordabasymen» teń oınady. Bul kezdesýde esep ashylǵan joq. Jalpy, osy týrda taǵy eki match, ıaǵnı, «Shahter» men «Oqjetpes» jáne «Qaısar» men «Taraz» arasyndaǵy kezdesýler golsyz ótti. Eń iri esep Qostanaıda bolǵan «Tobyl» – «Jetisý» oıynynda tirkeldi. Qo­naqtardyń úsh birdeı dobyna alań ıeleri jalǵyz golmen jaýap qaıtardy. Sondaı-aq, osy týrda Pav­lodarda jergilikti «Ertis» «Atyraýdy» 2:0 esebimen jeńdi. Týrnır kestesinde «As­tanadan» keıingi ekin­shi satyǵa «Qaırat» jaı­ǵassa, «Aqtóbe» ázirge úz­dik úshtikti túıindep tur. Premer-lıganyń 24-týr oıyn­­dary 22-23 tamyzda oınalady. Aıta keteıik, bul aınalymda komandalar týrnırdiń birinshi bóliginiń qorytyndysy boıynsha alty-altydan eki topqa bólinip synǵa túsedi. Alǵashqy altylyq chempıonat medaldaryna talassa, ekinshi top kelesi maýsymdy joǵary dıvızıonda bastaý úshin kúsh synasady. Elaman QOŃYR, «Egemen Qazaqstan».