Byltyr dál osy týrnırde Anna Danılına men serbııalyq Aleksandra Krýnıch juby bas júldege talasyp, sheshýshi synda ıtalııalyq Sara Erranı men Jasmın Paolınıge ese jibergen edi. Bıyl da olar sol mejege jetti. Bastapqy básekelerde barlyq qarsylasynan basym túsip, jartylaı fınalda Sıýko Aoıama (Japonııa)/Lıan Enshýony (Taıpeı) erkin eńsergen olar sheshýshi synda Katerına Sınıakova (Chehııa)/Teılor Taýnsendten (AQSh) utyldy. 1 saǵat 33 mınýtqa sozylǵan saıys 2:6, 5:7 esebimen aıaqtaldy. Qatarynan ekinshi jyl «Rolan Garrostyń» fınalynda óner kórsetken Anna men Aleksandraǵa jankúıerler dán rıza.
Jekelegen saıysta jerlesterimiz tym súreńsiz óner kórsetti. Dúnıejúzilik reıtıngide úzdik ondyqty túıindegen Aleksandr Býblık tusaýkeser kezdesýinde ATR tiziminde ózinen 70 saty tómen turǵan germanııalyq tennısshi Iаn-Lennard Shtrýftyń aldynda dármensizdik tanytty. Álemniń ekinshi raketkasy Elena Rybakına ekinshi kezeńde buryndary esh kózge túspegen Ýkraınanyń ortańqol oıynshysy Iýlııa Starodýbsevadan oıda joqta utyldy. Sol sekildi Aleksandr Shevchenko men Iýlııa Pýtınseva da uzaqqa shappady.
Jalpy, bıylǵy týrnır tosyn nátıjelerge toly boldy. Máselen, alǵashqy aınalymda Danııl Medvedev (ATR №8) Adam Ýoltonnan (97), Djessıka Pegýla (WTA №5) Kımberlı Bırrelden (86), Lında Noskova (WTA №12) Marııa Sakkarıden (49) jeńildi. Ekinshi kezeńde álemniń birinshi raketkasy Iаnnık Sınner Hýan-Manýel Cherýndoloǵa (26) ese jiberse, osy sport túri tarıhyndaǵy eń ataqty oıynshy, serb Novak Djokovıch (ATR №4) brazılııalyq Jýan Fonsekaǵa (30) jol berdi. Ile-shala Fonseka áıgili Kasper Rýýdty (14) qapy qaldyrdy. Sonymen qatar Ben Shelton (ATR №5) Rafael Kollınonnan (62), Iga Shventek (WTA №3) Marta Kostıýkten (15), Koko Gaýff (WTA №4) Anastasııa Potapovadan (27) utyldy. Búginde tórtkúl dúnıeniń teńdessiz tennısshisi dep tanylyp otyrǵan Arına Sobolenko (WTA №1) shırek fınalda Dıana Shnaıderge (№23) ese jiberdi.
Sensasııalar odan keıin de jalǵasty. Áıelderdiń jartylaı fınalynda álemdik reıtıngide 114-orynda turǵan polshalyq Maııa Hvalınska reseılik Dıana Shnaıderdi utty – 7:6, 6:4. Reseıdiń taǵy bir ókili Mırra Andreeva ýkraınalyq Marta Kostıýkti qapy qaldyrdy – 6:1, 6:3. Fınalda Andreeva Hvalınskadan aılasyn asyrdy – 6:3, 6:2. Sóıtip, 19 jastaǵy Mırra «Úlken dýlyǵy» týrnırinde tuńǵysh ret top jardy.
Erler arasynda jartylaı fınalda álemniń úshinshi raketkasy, germanııalyq Aleksandr Zverevtiń chehııalyq Iаkýb Menshıkten (№27) mereıi ústem boldy – 7:5, 6:2, 3:6, 6:3. Italııanyń qos tennısshisi – Flavıo Kobollı (ATR №14) men Matteo Arnoldı (№104) arasyndaǵy aıqasta ekinshi fınalıst anyqtalýǵa tıis edi. Alaıda aıaqasty syrqattanyp qalǵan Arnoldı kortqa shyqpady.
Bas júlde básekesi Zverev pen Kobollı arasynda ótti. Buǵan deıin ekeýi de «Úlken dýlyǵada» daralanbaǵan. Ár jyldary AQSh, Aýstralııanyń ashyq birinshiligi, «Rolan Garrostyń» fınalynda oınaǵan Aleksandr úsh rette de jeńilistiń kermek dámin tatty. Flavıonyń eń zor tabysy – byltyr «Ýımbldonnyń» shırek fınalyna shyǵýy. Parıjde qos sańlaq uzaq tiresti. 4 saǵat 20 mınýtqa sozylǵan tartys 6:1, 4:6, 6:4, 6:7, 6:1 esebimen nemis tennısshisiniń paıdasyna sheshildi. Sóıtip, A.Zverev týrnır jeńimpazy atandy.
Júlde qory 61 723 000 eýrony quraǵan jarystyń jekeleı saıystaǵy jeńimpazdary 2,8 mln oljalasa, fınalda utylǵandar sol somanyń teń jartysyn ıelendi. Jartylaı fınalǵa joldama alǵandar 750 myń, shırek fınalǵa shyqqandar 470 myń eýro enshiledi. О́zge tennısshiler mynadaı mólsherde syıaqy aldy: tórtinshi kezeń – 285 myń eýro (158 283 300 teńge), úshinshi kezeń – 187 myń (103 856 060 teńge), ekinshi kezeń – 130 myń (72 199 400 teńge), birinshi kezeń 87 myń (48 318 060 teńge).
