Kezdesý barysynda Qazaqstan men Dúnıejúzilik bank toby arasyndaǵy sıfrlandyrý, jasandy ıntellekt, GovTech jáne telekommýnıkasııalyq ınfraqurylymdy damytý salalaryndaǵy áriptestikti odan ári nyǵaıtý máselesi qaraldy. Jıynda elimizdegi «Derekterdi óńdeý ortalyqtary alqaby» jobasyn júzege asyrý máselesine nazar aýdaryldy. Talqylaýǵa Prezıdent keńesshisi – Strategııalyq josparlaý jáne reformalar agenttiginiń tóraǵasy Áset Erǵalıev, Jasandy ıntellekt jáne sıfrlyq damý, Ulttyq ekonomıka, Qarjy vıse-mınıstrleri qatysty.
«Jalpyulttyq referendýmda qabyldanǵan jańa Konstıtýsııa tehnologııalyq ınnovasııalar men jedeldetilgen sıfrlyq transformasııa arqyly ekonomıkany nyǵaıtýǵa múmkindik ashty. Prezıdent Qasym-Jomart Toqaev elimizdi tolyqqandy sıfrlyq elge aınaldyrý jónindegi strategııalyq maqsatty aıqyndady. Bul jyl Sıfrlandyrý jyly dep jarııalanyp, ekonomıkanyń barlyq salasyna JI sheshimderin aýqymdy engizýge basymdyq berilip otyr. 2029 jylǵa deıingi «Digital Qazaqstan» jalpyulttyq strategııasy qabyldandy. Qazaqstannyń sıfrlyq transformasııa baǵdarlamasyn ilgeriletýge Dúnıejúzilik banktiń qosqan eleýli úlesin erekshe atap ótkim keledi. Biz josparlaǵan barlyq bastamanyń ýaqtyly júzege asyrylýyna úlken mán beremiz», dedi Úkimet basshysy.
Elimiz Dúnıejúzilik banktiń GovTech jetilý ındeksiniń (GTMI) «A» tobyna kiredi ári álemde 6-orynda tur. Búginde Dúnıejúzilik bankpen birlesip ınklıýzıvti ekonomıkaǵa jedeldetilgen sıfrlandyrý, JI salasynda adam kapıtalyn damytýǵa qatysty birqatar birlesken jobalardy júzege asyryp jatyr.
Dúnıejúzilik banktiń sıfrlyq tehnologııalar jáne jasandy ıntellekt jónindegi vıse-prezıdenti Sangbý Kım elimizde sıfrlandyrý deńgeıi joǵary ekenin atap ótti. Mańyzdy jobalardyń qatarynda Derekterdi óńdeý ortalyqtaryn damytý, Kaspıı arqyly sýasty talshyqty-optıkalyq kabelin salý, aýyldyq jerlerde baılanysty qamtamasyz etý ári sıfrlyq memlekettik servıster, jasandy ıntellekt jáne tehnoparkter salasyndaǵy bastamalar bar. Dúnıejúzilik bank osy bastamalarǵa qoldaý kórsetýge daıyn.
«Qazaqstandaǵy sıfrlandyrýdyń qazirgi mártebesi – kóptegen basqa damýshy eldermen salystyrǵanda óte ozyq. Sizderde jaqsy damyǵan mobıldi baılanys, sapaly qyzmet kórsetetin elektrondyq úkimet platformasy, jeke sektorǵa arnalǵan damyǵan ekojúıe, tıimdi ulttyq strategııa jáne saıasat bar. Jaqynda JI salasynda jańa zań qabyldadyńyzdar. Osynyń bári óte keremet uıymdastyrylǵan. Men sizdermen jumys isteı bastaǵanyma óte qýanyshtymyn. Jasandy ıntellekt salasynda jańa syn-qaterler bar, sondyqtan da bul mindetti júzege asyrý bárimiz úshin ońaı soqpasy anyq», dep atap ótti Sangbý Kım.
Kezdesý qorytyndysynda mártebeli meıman elimizdi Dúnıejúzilik banktiń sıfrlandyrý jáne jasandy ıntellekt jónindegi jahandyq strategııasynyń negizgi seriktes ári qatysýshy el bolýǵa shaqyrdy. Baǵdarlama sıfrlyq ekonomıkaǵa ınvestısııa tartýǵa baǵyttalǵan. Tıptik kelisim baǵyttary sıfrlyq baılanys pen ınfraqurylymdy damytý, sıfrlyq memlekettik platformalar men sáıkestendirý júıelerin jetildirý, derekterdi retteý, kıberqaýipsizdikti qamtamasyz etý, sondaı-aq sıfrlyq daǵdylardy damytý, jasandy ıntellekt ekojúıesin ilgeriletýdi qamtıdy. Elderge arnalǵan sıfrlyq kelisimder ár memlekettiń ulttyq basymdyqtaryna sáıkes beıimdeledi.
Premer-mınıstr Oljas Bektenov vıse-prezıdent Sangbý Kımge jáne Dúnıejúzilik bank komandasyna Qazaqstannyń sıfrlyq transformasııa salasyndaǵy bastamalaryn qoldaǵany úshin alǵys aıtyp, Úkimettiń World Bank Digital Compact-ke qatysýǵa daıyndyǵyn atap ótti.
