Sý tasqynyna daıyndyq pysyqtaldy

Jaqynda oblys ákimi Arhımed Muhambetovtiń tóraǵalyǵymen ótken tótenshe jaǵdaılardyń aldyn alý jáne joıý jónindegi oblystyq komıssııanyń kezekti otyrysynda sý tasqynyna qarsy sharalar jáne oǵan daıyndyq týraly keńinen áńgime boldy. Oblystyq tótenshe jaǵdaılar departamentiniń basshysy Baýyrjan Syzdyqovtyń habarlaýynsha, kóktemgi sý tasqynyn ótkizýge qajetti keshendi daıyndyq jumystary qazirdiń ózinde qolǵa alynǵan. Oblystyq, qalalyq jáne aýdandyq sý tasqynyna qarsy komıssııalar jumys isteýde. Oblys aýmaǵyndaǵy 145 sý sharýashylyǵy nysandarynyń 8-i respýblıka­lyq, 118-i kommýnaldyq, 18-i jeke­menshik baǵynysqa jatady. О́t­ken jyldardyń tájirıbelerin taldaý qorytyndylary boıyn­sha oblys aýmaǵynyń sý basý qaýpi bar oryndarynyń tólqujaty ja­salyp, bekitilgen. Aldyn ala alynǵan aqparattarǵa qara­ǵanda, qazirgi ýaqytta eldi meken­derge jaqyn ornalasqan sý sharýashylyǵy nysandarynyń jaı-kúıi qanaǵattanarlyq, eldi mekenderge tónip turǵan úlken qaýip joq. Alaıda, jergilikti bılik jáne sý sharýashylyǵy mekemeleri tarapynan Aqtóbe, Qarǵaly jáne Sazdy sý qoımalaryna basa nazar aýdarylýda. Qazir Aqtóbe sý qoımasynda 142 mıllıon tekshe metr sý bar, bul – jobalyq kólemniń 58 paıyzyna teń. Qarǵaly sý qoımasynda 152 mıllıon tekshe metr ustalýda nemese jobalyq kólemniń 54 paıyzy. Sazdy sý qoımasynda 2,2 mıllıon tekshe metr sý bar, ol jobalyq kólemniń 32 paıyzyn quraıdy. О́ńirde sý tasqynyn boldyrmaý maqsatynda 84 tonna jaǵar-janarmaı, 6860 tonna ınerttik materıaldar, 8490 qaptar, 10 tonna jarylǵysh zattar qory jasalǵan. Sý tasqynyn qalypty ótkizýge jáne atalǵan sharalardy atqarýǵa 90 mıllıon teńgeden astam qarajat bólingen. Búgingi kúnge Aqtóbe qalasynyń aýmaǵynan jáne oblystyń eldi mekenderinen 98 myń tonnadan astam qar shyǵaryldy. Tıisti dári-dármek jaǵy qarastyrylyp, sanıtarlyq sharalar oılastyryldy. Apattardyń aldyn alý medısınalyq ortalyǵynyń jedel áreket etý jáne alǵashqy kómek kórsetý brıgadalary uıymdastyryldy. «QazSýShar» respýblıkalyq memlekettik kásipornynyń Aqtóbe fılıalynyń dırektory Bekzat Nametovtiń aıtýynsha, oblysqa byltyr respýblıkalyq bıýdjetten 113 mıllıon teńge qarjy bólinip, Qarǵaly sý qoımasy qaıta jańǵyrtylǵan. Bıyl Sazdy sý qoımasyna da qarjy qaralǵanyn, biraq qazirgi ekonomıkalyq jaǵdaıǵa baılanysty is toqtatylǵanyn tilge tıek ete kelip, másele jalǵasyn tapsa degen tilegin jetkizdi. Ol bıyl Qostanaı oblysynan keletin Yrǵyz jáne Torǵaı ózenderiniń sýy joǵary bolady degen boljamdy alǵa tartyp, jergilikti mamandar muny eskerip, soǵan oraı tıisti sharalar alý qajettigin eske saldy. Tıisti mekemelerdiń basshylarynyń habarlamalaryn tyńdaǵannan keıin oblys basshysy Aqtóbe qalasy jáne aýdandardyń ákimderine sý tasqynyna qarsy sharalar alý jóninde birqatar naqty tapsyrmalar berdi. Satybaldy SÁÝIRBAI, «Egemen Qazaqstan». Aqtóbe oblysy.