Soltústik Qazaqstanda týberkýlez jandardy májbúrlep emdeýde

PETROPAVL. 4 naýryz. Soltústik Qazaqstan oblysynda dárigerler asa juqpaly ári qoǵam úshin úlken qaýip tóndiretin týberkýlezdiń ashyq túrimen aýyratyndardy tártip saqshylarymen birlese izdep, májbúrlep emdeý sharalaryna kiristi. Bul týraly oblystyq densaýlyq saqtaý basqarmasynyń baspasóz qyzmeti habarlady. О́tken jyly óńirde týberkýlezben syrqattaný – 5,5, odan qaıtys bolý kórsetkishi 21,2 paıyzǵa azaıǵan. Alaıda, túrmede qurt aýryna shaldyqqandar bostandyqqa shyqqannan keıin em-dom alýdyń ornyna qaıtadan qylmysqa baratyny, maskúnemdikke salynatyny alańdatpaı qoımaıdy. Dertin jasyryp, saıdan sanyn, qumnan izin taptyrmaıtyndar da osy sanattaǵylar. Keıingi kezderi olardyń arasynda ózgeniń atyn jamylyp, emdeletinder kóbeıip ketken. Solardyń biri oblys ortalyǵynda avtobýspen jolaýshylar tasyp júrgen jerinen quryqtalyp, eriksiz emdelýge jatqyzylǵan. «Týberkýlez – áleýmettik aýrý. Bul keselmen aýyratyndar kúnine 40 adamǵa deıin juqtyra alady. Indetten túbegeıli aıyǵý aılarǵa, jyldarǵa sozylady. Bizdi qatty qınaıtyny –túrmede koh taıaqshasyn juqtyrǵandardyń jazalaryn ótegen soń qashyp ketetini. Osyndaı 16 naýqasqa izdeý salynǵan. Bular belgilileri ǵana. «Qujattarymdy joǵalttym» degen syltaýmen búrkenshik atpen júrgenderi qanshama?!», deıdi oblystyq týberkýlezge qarsy kúres dıspanseriniń bas dárigeri Pavel Sobolevskıı. Kóshi-qon polısııasynyń ınspektory Almas Temirbekovtyń aıtýynsha, izdestirý is-sharalary nátıjesiz emes. Búginge deıin qurt aýrýynyń ashyq túrine ushyraǵan 4 naýqas tabylyp, dárigerlerge tapsyrylǵan. О́mir Esqalı. Derek: Soltústik Qazaqstan oblystyq densaýlyq saqtaý basqarmasynyń baspasóz qyzmeti. Sýret: mzsr.gov.kz.