Petropavlda 134 jas maman turaqty jumysqa tartyldy

PETROPAVL. 4 naýryz. Petropavlda joǵary jáne arnaýly oqý oryndaryn támamdaǵan 134 jas maman «Jumyspen qamtý jol kartasy-2020» baǵdarlamasy sheńberinde turaqty jumysqa ornalasty. Bul týraly qalalyq jumyspen qamtý ortalyǵy habarlady. Ortalyqtyń dırektory Aıjan Ilııasovanyń málimdeýinshe, jastar tájirıbesi aıasynda 95 adamdy jumysqa tartý josparlansa, nátıjesinde 134 adam ornalastyrylǵan. Bul maqsat úshin respýblıkalyq qazynadan 16 mıllıon 931 myń teńge bólingen. Memlekettik baǵdarlama boıynsha jumys tapqan Álııa Imambaeva M.Qozybaev atyndaǵy Soltústik Qazaqstan memlekettik ýnıversıtetin ekolog mamandyǵy boıynsha támamdaǵan. Álııa oqýyn aıaqtaǵannan keıin biraz ýaqyt jumyssyz júrip qalǵan. Tek jumyspen qamtý ortalyǵyna kelgennen keıin  qalalyq ekologııa departamentinde 6 aı tájirıbeden ótip, kásibı jaǵynan ysylǵan. Nátıjesinde, sol mekemege jumysqa qabyldanyp, alǵashqy eńbekaqysyna da ıe bolypty. «Mekemeler men kásiporyndar kóbine jumys ótiliniń, tájirıbeniń bolǵanyn qalaıdy. Biz osyndaı tyǵyryqtan shyǵý maqsatymen jumyssyz júrgen 29 jasqa deıingiler jaıly jan-jaqty málimetter jınaqtadyq. Qazir memlekettik baǵdarlama boıynsha kómek kórsetýdiń, jumysqa ornalastyrýdyń keshendi is-sharalary túzilip, yqtımaldy joldar qarastyrylýda», deıdi Aıjan Boranbaıqyzy. О́mir Esqalı. Derek: Petropavl qalalyq jumyspen qamtý ortalyǵy. Sýret: petropavl.sko.kz.