Ýaqyt talaby týyndatqan mindetter

Keshe Premer-Mınıstr Kárim Másimovtiń tóraǵalyǵymen Úkimette selektorlyq keńes ótti. Onda Úkimet basshysy jańa aqsha-nesıe saıasatyna kóshý týraly málimdedi. Premer-Mınıstr Kárim Má­si­mov Qazaqstanda ınflıasııa­lyq targetteýge negizdelgen jáne ulttyq valıýtanyń aıyrbas baǵamyn erkindikke jiberýdi qarastyratyn jańa aqsha-nesıe saıasaty engizi­letinin habarlady. Úkimet bas­shysynyń málimdeýinshe, álemdik ekonomıkadaǵy qazirgi jaǵdaı bizge de ekonomıkalyq ósim men baǵa turaqtylyǵy arasyndaǵy teńgerimdi qamtamasyz etý úshin jańa aqsha-nesıe saıasatyn qabyldaýdy  talap etip otyr. Osyǵan oraı Ulttyq bank pen Úkimet 2015 jyldyń 20 tamyzynan bastap valıýtalyq dálizdi alyp tastaýǵa jáne aıyrbas baǵamyn erkindikke jiberýge kóshýge negizdelgen jańa aqsha-nesıe saıasatyn júzege asyrýǵa kirisý jóninde sheshim qabyldady. «Aǵymdaǵy jyldyń 15 tamyzynda Ulttyq bank valıýta baǵamynyń dálizin keńeıtý maqsatymen teńgeniń aıyrbas baǵamynyń erkin naryqta qalyptasýyn qamtamasyz etýge qatysty sheshim qabyldaǵan bolatyn. Bul óz kezeginde bizdiń ekonomıkamyzǵa óz áserin tıgizbeı qoımaıtyny belgili. Onyń ústine jahandyq ekonomıkadaǵy jaǵdaı ýaqyt ótken saıyn turaqsyz­da­nyp keledi», dedi K.Másimov. Sonymen qatar, Úkimet basshysy bizdiń ekonomıkamyzdyń negizgi tiregi bolyp sanalatyn eksporttyq ónimderimizge qatysty naryq baǵalarynyń da quldyrap jatqandyǵyn atap ótti. Qazaqstannyń negizgi eksporttaıtyn ónimderi munaı men metall syndy shıkizattyq taýarlarǵa da suranys tómendep, baǵa túsip jatqany belgili. Bul bizdiń IJО́-niń kóleminiń azaıýyna ákep soǵady jáne ol ishki ekonomıkamyzdy álsiretýi de múmkin. Sondyqtan da biz­diń ekonomıkalyq saıasatymyz eń aldymen áleýmettik-eko­nomıkalyq turaqtylyqqa negizdelýi kerek,  dedi ol. Sondaı-aq, Úkimet basshysy otandyq ónim óndirýshilerdi turalatyp almaý maqsatynda jáne kredıttik belsendilik pen ınvestısııalyq tartymdy­­lyqty báseńdetpeý arqyly jumyssyzdyqtyń aldyn alý jaıyna jan-jaqty saraptama jasaý kerektigin de eskertti. Úkimet basshysy osy sátten bastap teńgeniń aıyrbas baǵamy naryq suranysy negizin­de jáne irgeli ishki jáne syrtqy mak­roekonomıkalyq faktor­lardy eskere otyryp qalyp­tasty­rylatynyn aıtyp ótti. «Bul aıyrbas baǵamy álsi­­­reýge qaraı, sondaı-aq, nyǵaıý­ǵa qaraı ózgerýi múmkin eken­digin bildiredi, ony álem ekono­mıkasyndaǵy jáne ishki valıýta naryǵyndaǵy jaǵdaı anyqtaıdy», dedi Premer-Mınıstr. Ol sondaı-aq, Ulttyq bank teńgeniń aıyrbas baǵamy deńgeıin qalyptastyrýǵa aralaspaıtynyn, alaıda eldiń qarjylyq júıesiniń turaqsyzdaný qaýpi týyndaǵan jaǵdaıda valıýtalyq ıntervensııa júrgizý arqyly ishki valıýta naryǵyna qatysý múmkinshiligin ózine qaldyratynyn aıtty. Memleket tarapynyń aralasýynsyz naryq suranysy men usynys negizinde aıyrbas baǵa­myn qalyptastyrý ekonomıka ósiminiń saýyǵýyna, nesıe jáne ınvestısııalyq belsendiliktiń artýyna, jańa jumys oryndarynyń qurylýyna, orta merzimdi bola­shaqta ınflıa­sııany 3-4 paıyz­ǵa deıin tómendetýge qajetti alǵyshart qurady. K.Másimov aıtyp ótkendeı, ınflıasııalyq targetteý reji­mine negizdelgen jańa aqsha-nesıe saıasatyn júzege asyrý eko­­nomıkalyq saıasattyń strate­gııalyq mindet­terin – otandyq ekono­mıkanyń uzaq merzimdi turaqty ósimine qol jetkizýge, ınflıa­sııanyń tómen deńgeıin saqtaýǵa, jumyspen qamtý deńgeıin artty­rýǵa jáne el halqynyń ál-aýqatyn jaqsartýǵa járdemesetin bolady. Premer-Mınıstr sóziniń qorytyndysynda teńge ba­ǵa­my­nyń erkin jiberilýine baılanys­ty baǵanyń negizsiz kóterilýine jol bermeýdi tapsyrdy. «О́ńir ákimderi shtabtarǵa basshylyq jasap, jergilikti bıýdjetten qarjylandyrylatyn ataýly áleýmettik jáne turǵyn úı kómekteriniń deńgeıin arttyrý arqyly halyqtyń áleýmettik az qamtylǵan tobyna qoldaý sharalaryn qabyldaýy tıis. Sonymen qatar, baǵanyń, ásirese, áleýmettik mańyzy bar azyq-túlikter men qyzmetter baǵalarynyń negizsiz ósimine jol bermeý boıynsha uıymdastyrý sharalaryn qabyldaýdy tapsyramyn»,  dedi Úkimet basshysy. K.Másimov sonymen qatar, jedel sharalardy jalpy úılestirýdi óziniń birinshi orynbasary Baqytjan Saǵyntaevqa, al áleýmettik máselelerdi orynbasary Berdibek Saparbaevqa júktedi. Premer-Mınıstrdiń málim etýinshe, senbi kúni Úkimet otyrysy ótip, onda qurylymdyq reformalar toptamasy, jedel sharalar, bıýdjettik sıpattaǵy máseleler jáne odan arǵy makro­ekonomıkalyq saıasat talqy­lanatyn bolady. Dınara BITIKOVA, «Egemen Qazaqstan».