Hokkeı. Álem chempıonaty. Reseı qatarynan ekinshi ret fınalǵa shyqty

ASTANA. 17 mamyr. Hokkeıden Chehııada ótip jatqan álem chempıonatynda fınalǵa shyqqan ekinshi komanda belgili boldy. Jartylaı fınalda Reseı AQSh-ty 4:0 esebimen jeńip, sheshýshi synnyń joldamasyn ıemdendi. Qos komanda toptyq kezeńde kezdesip, AQSh 4:2 esebimen jeńiske jetken bolatyn. Bul týraly egemen.kz habarlady. AQSh – Reseı 0:4 (0:0, 0:0, 0:4) Goldar: Sergeı Mozıakın 48, Aleksandr Ovechkın 51, Vadım Shıpachev 56, Evgenıı Malkın 59 (bos qaqpaǵa). Reseı fınalda Kanadamen kúsh synasady. О́z kezeginde kanadalyqtar jartylaı fınalda Chehııany 2:0 esebimen jeńgen bolatyn. Osy rette, AQSh pen Reseıge qatysty álem chempıonattaryndaǵy keıbir qyzyqty derekterge toqtalýdy jón kórdik.Búgingi oıyndy qosqanda qos komanda álem chempıonattarynda 13 ret kezdesken. Sonyń 7-ýinde soltústiktegi kórshimiz jeńse, 5 márte amerıkalyqtar basym túsken. Al bir márte teń esep tirkeldi. Sondaı-aq, AQSh 1960 jyldan beri álemdik dodanyń fınalyna shyǵa almaı keledi. Sol jyly óz jerinde ótken jarysta Amerıka sheshýshi synda Kanadany jeńip, ázirge sońǵy ret álem chempıony atandy. Soltústik Amerıka ókilderi sońǵy 45 jylda atalǵan saıysta 4 ret qola júldeger atandy. Jalpy, olar tarıhynda 11 ret fınalǵa shyǵyp, 2-aq ret chempıon atanǵan. Al Reseı tek sońǵy 3 jyldyń ishinde 2 ret álem chempıonatyn jeńip aldy. Orystar KSRO taraǵaly jarystyń fınalyna 7 ret shyǵyp, 5 márte chempıondyqqa qol jetkizgen. Odan bólek, 2 ret dodanyń qola júldegeri atandy. Aıta keter jaıt, álem chempıonaty erteń aıaqtalady. Aldymen qola júlde úshin AQSh pen Chehııa aıdynǵa shyǵady. Al odan keıin fınalda Kanada men Reseı chempıondyq ataqty sarapqa salady. Elaman Qońyr. Derek: egemen.kz. Sýret: eurosport.ru.