Investısııalar jáne damý mınıstri Áset ISEKEShEV: «Daǵdarysqa qaramastan biz ınvestorlarmen belsendi jumys isteýdi jalǵastyramyz»

  Investısııalar jáne damý mınıstrligi, «barlyq týyndaǵan qıynshylyqtarǵa qaramastan, Elbasy aıtqandaı, ındýstrııalandyrý saıasatyn jańa jaǵdaılarǵa beıimdeı otyryp, jalǵastyrýy qajet», dep esepteıdi. Mınıstr Áset Isekeshevtiń pikirinshe, búginde ınvestorlar men tehnologııalardy tartý boıynsha jumystardy jalǵastyrý óte mańyzdy; ár tartylǵan mıllıon teńge, ár qurylǵan jumys orny basymdyq berilgen baǵyt. Jumystyń bir baǵyty – qaıta ınvestısııalaý. Qazaqstanda jumys isteıtin ınvestorlar óndiristi keńeıtýdi jalǵastyrýy, ónim jelisin keńeıtýi, jańa ónimder shyǵarýy jáne óndirim­dilik deńgeıi joǵary jańa sapaly jumys ornyn ashýy qajet. Osyǵan baılanysty mınıstrlik atqarǵan jumys nátıjeleriniń birine jańa jobalarǵa qaıta ınvestısııalaý boıynsha ın­­ves­­torlarmen qol qoıylǵan 20-dan asa jasalǵan kelisimder jatady. Oǵan mysal retinde Almaty oblysyndaǵy qaıta ınvestısııalaý esebinen ashylǵan tórt óndiris ornynyń iske qosylýyn atap ótýge bolady. Atap aıtqanda, BTM Group kompanııasynyń zaýyty. Investısııalardyń jalpy kólemi 30 mln. AQSh dollaryn quraıdy, 2017 jyly munda 120 jumys orny ashyl­ady. Bıyl BTM Group jabyn gıdrooqshaýlaǵysh membranalardy (baǵyttalatyn bıtýmdyq rýlondyq gıdrooqshaýlaǵysh) óndirýden túsken alǵashqy paıdany qaıta ınvestısııalaıdy. «Biz Qazaqstanda 8 jyldan beri jumys istep kelemiz jáne ekinshi óndiris ornyn ashyp otyrmyz. О́tken jyly ekstrýzıondyq penopolıstıroldan jylý oqshaýlaǵysh taqtalar óndirisi boıynsha ekinshi jelini ornattyq, al búginde jabyn gıdrooqshaýlaǵysh membranalar óndirisin bastadyq. Taǵy da osy jyly gofrlengen jabyn tabaqshalarynyń jáne bıtým emýlsııasynyń óndirisin bastaýdy josparlap otyrmyz. Biz osymen toqtap qalýǵa nıetti emespiz. Qazaqstanda sheteldik ınvestorlarǵa bıznes júrgizý úshin qolaıly jaǵdaı jasalǵan, bizdiń kompanııa Ortalyq Azııadaǵy óńirlik óndiristiń jetekshisi bolady degen úmittemiz» – dep atap ótti BTM Group Basqarma múshesi Fyrat Oran. Ekinshi nysan – sút ónimin shyǵaratyn Danone zaýyty, QR ÚIIDMB iske asyrý jyldarynda (2010-2015 jj.) kásiporynnyń qýaty 5 esege artyp, jylyna 2 398 tonnadan 11 000 tonnaǵa deıin ónim shyǵarady. Aldyńǵy salynǵan qarajatty eskergendegi ınvestısııalardyń jalpy kólemi 19 mln. AQSh dollaryn qurady. «Danone Berkut kompanııasy sút óniminiń óndirisi kólemin ulǵaıta otyryp, búginde sút qyshqyldy ónimderdi iske qosty. Olar – «Bıo Balans Tan» jáne «Bıo Balans Sladkıı». Qazaqstandaǵy kóptegen taýar óndirýshiler sút ónimin óndirý úshin ımporttyq qurǵaq sútti satyp alýǵa sheshim qabyldaıdy, sebebi osyndaı shıkizattar qaımaǵy alynbaǵan sútke qaraǵanda arzanǵa túsedi jáne sáıkesinshe quny da tómen. Osylaısha jergilikti fermerlerdiń tabıǵı shıkizat ónimi qajetsiz bolyp qalady. Búgingi kúni bizdiń ónimniń óndirisine qajetti barlyq shıkizat Qazaqstanda jasalady. Danone Berkut 2300 jetkizýshimen yntymaqtastyqta. Olardyń 1800-i qazaqstandyq kompanııa, onyń ishinde 11 fermerlik sharýa­shylyq bar. Naryqqa jańa ónimderdi engizý jergilikti fermerlik sharýashylyqtan satyp alynatyn shıkizattyń sanyn arttyra otyryp, tutynýshyǵa Qazaqstanda óndirilgen sapaly ónimdi beredi. Osynyń barlyǵy sheteldik ınvestorlar úshin jasalǵan qolaıly jaǵdaıdyń arqasynda múmkin bolyp otyr jáne ol jyldan jylǵa jaqsaryp keledi. Danone kompanııasynyń uzaq merzimdi josparlary bar ekendigin jáne óziniń óndiristik qyzmetin keńeıtetindigin atap ótkimiz keledi» – dedi Danone Berkut kompanııasynyń bas dırektory Reno Shamonal. Al «Almaty jeldetkish zaýyty» JShS-de (AJZ) aýmaǵynda «LG Electroniss Almaty Kazakhstan» AQ-pen birikken AJZ iske asyratyn ortalyqtandyrǵan kondısıonerler óndirisi bastaldy. Joba Qazaqstan aýmaǵynda 3 satydan turatyn LG Electronics  brendi arqyly shyǵatyn quraldy óndirýdi josparlap otyr. Oǵan salynǵan ınvestısııalardyń jalpy kólemi 3,7 mln. AQSh dollaryn quraıdy. «Indýstrııalandyrýdyń pre­zı­denttik baǵdarlamasy bizdiń zaýyttyń jańarýyna jáne zamanaýı quraldardy satyp alýǵa, aldyńǵy qatarly tehnologııalardy óndiriske engizýge múmkinshilik berdi. Osynyń nátıjesinde biz tehnologııalyq áriptes retinde LG Electronics kompanııasyn tarta aldyq. Osydan keıin koreı tarapynyń zamanaýı tehnologııalary bazasynda ortalyqtandyrylǵan kondısıonerler óndirisin bastaımyz», – dep atap ótti «Almaty jeldetkish zaýyty» JShS dırektorlar keńesiniń tóraǵasy Marat Baqqulov. Tórtinshi joba – Galaksi Group kompanııasy. Búgingi kúni onda «Rossi» brendimen plastıkalyq tereze jaqtaýlary men shtapıkter óndirisi iske qosyldy. Indýstrııalandyrýdyń birinshi besjyldyǵynda (2010-2015jj. arnalǵan QR ÚIIDMB) Galaksi Group kompanııasy barlyq ónim jelisi boıynsha óndiristik qýatty eki esege arttyrdy: 12846 tonnadan 20500 tonnaǵa deıin jáne 2016 jyldyń aıaǵynda jańa óndiristi eskere otyryp, 28000 tonnaǵa deıin arttyrýdy josparlap otyr. Mundaǵy óndiristik qýatty arttyrý jumys ornynyń sanyna da oń áser etti. Eger 2010 jyly kompanııa 178 jumys ornyn qamtamasyz etse, 2013 jyly  563 adamdy jumyspen qamtydy. Al aǵymdaǵy jyly 658 adam Galaksi Group kompanııasynda turaqty jumys ornymen qamtamasyz etildi. Fatıh Ýzýnoǵly, Galaksi Group kompanııasynyń quryltaıshysy, bas dırektory: «Galaksi Group kompanııasy 50 mıllıon AQSh dollarynan artyq qarajatty ınvestısııalady. Ár ýaqytta óziniń óndiristik qýatyn keńeıtip keledi jáne ónimniń jańa túrlerin ıgerýde. Biz óz segmentimizde jetekshi bolatyndyǵymyzǵa talpynyp kelemiz jáne jyldan jylǵa jańa jobalardy qaıta ınvestısııalaımyz. Osy jyldyń sońyna deıin biz tereze jáne esik bólshekteri men latýn taıaqshalar óndirisin bastaýdy josparlap otyrmyz. Osy bastamalardy iske asyrý Qazaqstanda ınvestorlar úshin tartymdy ınvestısııalyq klımatty jasaýdyń, memleket tarapynan qoldaýdyń jáne ındýstrııa­landyrý baǵdarlamasynyń aıasynda jasalǵan jalpy jaǵdaıǵa baılanysty múmkin bolyp otyr», –  dep atap ótti. Jalpy alǵanda Investısııalar jáne damý mınıstrliginde atap ótilgendeı, Qazaqstannyń óńdeýshi ónerkásibinde 126 sheteldik ınves­tor jumys isteıdi. Olar 6 mlrd. AQSh dollary somasyna 150 jobany iske asyryp otyr jáne 20 myń jumys ornyn qamtamasyz etýde. Osy 126 sheteldik ınvestordyń ishindegi 40, ıaǵnı ár úshinshisi óziniń óndiristik qyzmetin keńeıtý ústinde nemese jańa jobalarǵa qaıta ınvestısııalaýǵa daıyn. «Egemen-aqparat».