Apatqa ushyraǵan «Proton» zymyranyna qatysty kommısııa iske kiristi

ALMATY. 18 mamyr. «Proton-M» zymyran tasyǵyshynyń apatqa ushyraýyna baılanysty memlekettik kommıssııa iske kiristi. Kommıssııany «Roskomos» mekemesiniń birinshi basshysy Igor Komarovtyń ózi basqarady. Bul týraly RIA "Novostı" habarlady. Apattyń mańyzdylyǵyna oraı kommıssııanyń quramyna Reseı Federasııasy Úkimetiniń janyndaǵy Áskerı-ónerkásip mekemesiniń, Zymyran-ǵaryshtyq birlestiginiń, sondaı-aq, zymyran ǵaryshtyq kásiporyndar men ınstıtýttardyń ókilderi kirdi. Meksıkalyq MexSat-1 jer serigi tirkelgen «Proton-M» zymyran tasyǵyshy 16 mamyr kúni tańerteń «Baıqońyr» ǵarysh aılaǵynan ushyrylǵan. Resmı málimetterge qaraǵanda, ushý barysynyń 497 sekýndynda baılanys úzilgen. Bul mezette zymyran-tasyǵyshtyń úshinshi satysynyń ajyraýyna, ıaǵnı zymyrannyń ǵarysh keńistigine shyǵýyna 1 mınýt ýaqyt qalǵan. Bir málimetter boıynsha zymyran ushý traektorııasynda tolyqtaı kúlge aınalǵan, endi bir málimetter boıynsha zymyrannyń kesek-kesek qaldyqtary Baıkal kóliniń mańyna qulaýy múmkin. «Roskosmostyń» baspasóz qyzmeti birinshi málimdemesinde meksıkalyq jer serigi men ushý baǵdarlamasy aldyn-ala saqtandyrylǵanyn habarlap úlgerdi. Apatqa úshinshi satydaǵy qozǵaýshy apparatttyń zaqymdanýy sebep bolǵan degen boljamdarǵa qaramastan, memlekettik kommıssııa ázirge bul týraly eshqandaı da málimet taratqan joq. Talǵat Súıinbaı. Derek, sýret: RIA "Novostı".