Bizdiń bazardaǵy otandastarymyz úsh aıǵa deıin tólemnen bosatylady

Qaırat BALABIEV, Ońtústik Qazaqstan oblystyq bazarlar qaýymdastyǵynyń tóraǵasy. Elbasynyń bıznes ókilderi, iri eksporttaýshy, «Atameken» ulttyq kásipkerler palatasy ókilderimen ótkizgen keńesin tyńdadyq. Oryn alǵan jaǵdaı bizdiń elde ǵana bolyp jatqan joq, álemdi qamtyǵan daǵdarystan qaýiptenbeımiz degen memleketti jáne kórip otyrǵan joqpyz. Memleket Basshysy munaı men metall baǵasynyń bes jylǵa deıin tómendeıtindigi yqtımal ekendigin aıtty. Barlyq memleketterdiń valıýtalary qunsyzdanyp jatqanda bizdiń dollarǵa qatysty baǵamdy ustap turýǵa tyrysýymyz jel dıirmendi toqtatýǵa umtylǵan Don Kıhottyń áreketindeı bolyp qalar edi. Bir jyldyń ózinde dollardy tejeýge ulttyq qordan on mıllıardtaǵan qarjy joǵalttyq. Ásire belsendilerdiń baıbalamyna qulaq asyp, ári qaraı osy áreketti jasar bolsaq, onda memleketimiz qıyn jaǵdaıǵa túsedi. Muny halyq bolyp uǵyp, Elbasynyń jańa ekonomıkalyq saıasat jónindegi tapsyrmalaryn bir kisideı oryndaýǵa tıispiz. Men ózim kentaýlyqpyn. Elbasy keńeste Qazaqstannyń maqtanyshyna aınalǵan Kentaý transformator zaýytynyń búgingi qıyn ahýalyn mysalǵa keltirdi. Básekege qabilet tómendegen, 50 jumysshy qysqarǵan, memleketke 30 mln. teńgeniń salyǵy tólenbegen. Biz baǵany yrqyna jiberý arqyly ǵana kásiporyndarymyzdy básekege qabiletti ete alamyz. Sondyqtan, Elbasynyń sheshimi qazaqstandyq kásipkerlerdiń paıdasyna jumys jasaıtyndyǵy sózsiz. Árıne, dollar baǵamynyń bosatylýy halyqqa aýyr tıedi. Kórshi memleketten azyq-túlik tasýshylar kiris-shyǵystaryn eseptep, taýarlaryn qaıta baǵalaýdan ótkizip jatyr. Osyǵan baılanysty Shymkent qalasynyń ákimi Ǵabıdýlla Ábdirahımov shuǵyl jıyn ótkizip, baǵa turaqtylyǵyn qamtamasyz etip arnaıy shtab qurdy. Shtab músheleri kúnine eki ret dúken, bazarlarǵa shyǵyp, baǵanyń sharyqtap ketpeýin qadaǵalaıdy. Men – Qazaqstan azamatymyn. Búginde tabysqa shyqqan kásipker bolsam ol – memleketimizdiń bıznes ókilderine jasaǵan qamqorlyǵynyń arqasy. Aqsha bárimizge kerek. Men de nesıe alyp jumys jasap jatqan kásipkermin. Osyndaı syn saǵatta únsiz qalýymyz azamattyǵymyzǵa syn. Sondyqtan, ózime qarasty bazarlardaǵy saýdagerlerdi úsh aıǵa deıin tólemnen bosatýǵa sheshim qabyldadym. Bul azyq-túlik baǵasynyń, basqa da taýarlardyń negizsiz qymbattaýyna toqtam bolady. Eldiń erteńin oılaǵan Elbasymyzdyń saıasatyna osylaı qoldaý bildirgim keledi. Múmkindigine qaraı barsha kásipkerlerdi de osyndaı ıgi iske shaqyrar edim. ShYMKENT.