Mektep – keme, bilim – teńiz

Almatydaǵy Respýblıka saraıynda qala ustazdarynyń jyl saıynǵy tamyz keńesi «Bilim berý mazmunyn jańartý: bolashaqqa baǵdarlaný» degen atpen bolyp ótti. Bul jıynǵa Qazaqstan Respýblıkasy Premer-Mınıstriniń orynbasary Berdibek Saparbaev, Qazaqstan Respýblıkasy Bilim jáne ǵylym mınıstriniń orynbasary Esenǵazy Imanǵalıev jáne Almaty qalasynyń ákimi Baýyrjan Baıbek qatysty. Qaladaǵy qyzmet kórsetý meke­­meleriniń basshylary, aýdan ákimderi men joǵary oqý oryn­darynyń rektorlary, bilim basqarmasynyń qyzmetkerleri men qala mektepteriniń ustazdary qatysqan keleli keńestiń ashylý saltanatynda Almaty qalasy bilim basqarmasynyń basshysy Rahat Shımasheva «Bilim berý júıesiniń jaǵdaıy» taqyrybynda baıandama jasap, 2014-2015 oqý jylynda qala mektepteri qol jetkizgen jetistikter men jalpy bilim júıesiniń ózekti máselelerine toqtaldy. Basqarma basshysynyń ese­bine saı ótken oqý jyly barysynda ınformatıkadan ótken álemdik olımpıadada el namysyn qorǵaǵan 4 oqýshynyń 2-ýi, ıaǵnı, halyqaralyq bilim dodasynyń kúmis jáne qola medalin ıelengen qos shákirt almatylyq bolsa, 2009 jyly halyqaralyq jáne respýblıkalyq bilim jarystarynda oza shaýyp júrgen daryndy shákirtterdi yntalandyrý maqsatynda qala bas­shy­lyǵy taǵaıyndaǵan «Úrker» tósbelgisine osy ýaqyt araly­ǵynda 1338 oqýshy ıe bolǵan. Qazirgi tańda qala mektepteri men bala baqshalarynda 22 myń oqytýshy men tárbıeshi, kásiptik kolledjderde 4 myńnan asa tálimger qyzmet etse, olardyń 1062-si respýblıkalyq, al 160-y shet elderde tájirıbe deńgeıin kóterý kýrstarynan ótken. Bıylǵy Ulttyq biryńǵaı testileý boıynsha Almaty qa­la­­synyń bitirýshileri qol jet­kizgen ortasha kórsetkish 92,1 ball bolyp, respýblıkalyq ortasha kórsetkishten 12,7 ball joǵary bolǵan. 28 mekteptiń shákirtteriniń ortasha kórsetkishi 100 jáne odan da joǵary ball bolsa, 120 ball joǵary kórsetkishke 78 oqýshy qol jetkizgen. Eń joǵary 125 baldy 1 oqýshy, 124 baldy 5 oqýshy alyp, qala shákirtteriniń 35 paıyzy 120-dan joǵary balǵa ıe bolǵan. Bul respýblıkalyq kórsetkishten 17 paıyzǵa joǵary jetistik. Qala mektepterin bitirýshi shákirtter arasynda 225 oqýshy «Altyn belgi» ıelenip, bul mejege 1 ball jetpeı qalǵan 19 shákirtke «Úzdik bitirýshi» kýáligi tapsyrylǵan. Budan ózge, qalalyq bilim basqarmasynyń basshysy qala­nyń jekelegen mektepteri men kolledjderinde halyqaralyq sanatqa saı tájirıbelik bilim berý baǵdarlamalary engizilip otyrǵandyǵy men shákirtterdi otansúıgishtikke tárbıeleý jumystarynyń jańa serpinge ıe bolatyndyǵyn aıtty. Jańa oqý jylynyń bas­talýymen qala muǵalimderin Qazaqstannyń Eńbek Eri, ardager ustaz Aıagúl Mırazova, Halyqaralyq aqparattyq tehnologııalar ýnıversıtetiniń rektory Dámır Shynybekov, «Belkamıt» birikken kásipornynyń bas dırektory Pavel Beklemıshov quttyqtap, aldaǵy oqý jylynda ustazdar qaýymyna jemisti eńbek, shákirtterge ǵıbratty bilim ıegeri atanýdy tiledi. Dástúrli ustazdar keńesine jıylǵan kópshilikti aldaǵy oqý jylynyń bastalýymen quttyqtaǵan qala ákimi Baýyrjan Baıbek alqaly keńes aldaǵy bilim berý jylynyń negizgi baǵyt-baǵdaryn aıqyndaý maqsatynda alar oryny men berer táliminiń zor ekendigin atap ótti. О́tken oqý jylynda qol jetkizgen jetistikter men keıbir mindetter retin, sondaı-aq aldaǵy jylǵa jasalar josparlar barysyn sóz ete kelip qala basshysy bilim berýdiń halyqaralyq tájirıbesin Nazarbaev zııat­kerlik mektebi turǵysynan satylap engizý, «Nurly Jol» memlekettik baǵdarlamasy aıasynda salynyp jatqan mektep qurlystaryn jandandyrý, qalalyq oqytýshylardyń bilim jáne tálim berý deńgeıin kóterý jumystaryn jańa deńgeıge kóterý kerektigine toqtaldy. Qalanyń bilim berý júıesinde muǵalimniń bedelin kóterý, pedagogtardyń materıaldyq jaǵdaıyn arttyrý maqsatynda Kembrıdj ýnıversıtetiniń baǵdarlamasy qoldanylyp, jańa formattaǵy 3 deńgeıli kýrsta 2300-ge jýyq qala muǵalimderiniń ustazdyq deńgeıin kótergenin jetkizýmen qatar, qala basshysy úzdik muǵalimderdi yntalandyrý barysynda qala qazanynan arnaıy qarajat bóldirýdiń de jaqsy dástúrge aınalǵandyǵyn jáne atalmysh úrdisti odan ári jalǵastyratyndyǵyn aıtty. Bul degenińiz 500 úzdik muǵalim men 1000-nan asa jas pedagogtiń árqaısysyna 150-300 myń teńge kóleminde qosymsha syıaqy tólenedi degen sóz. Almaty qalasynyń ákimi eńbek jolynda erekshe kózge túsip, shákirt tárbıeleý isinde zor jetistikterge qol jetkizgen 32 mektep dırektoryna «Almaty» shıpajaıynda em qabyldap, dem alýy úshin joldama tabystap, qaladaǵy eń úzdik bilim berý mekemesi retinde úlgili dárejege ıe bolǵan M.Maqataev atyndaǵy mektep ujymyna 17 mıllıon 91 myń teńgeniń arnaıy sertıfıkatyn tapsyrdy. Qazaqstan Respýblıkasy Premer-Mınıstriniń orynbasary Berdibek Saparbaev Almaty qalasynyń ustazdaryna bastalǵaly turǵan oqý jylynyń tabysty da jemisti bolýyn tileı kele, elimizde bilim-ǵylym salasyna Elbasy Nursultan Nazarbaev pen Úkimet tarapynan erekshe kóńil bólinip, tolaıym qoldaý kórsetilip otyrǵandyǵyn basa aıtty. – Árbir memlekettiń damýy – onyń bilimdi azamattaryna tikeleı baılanysty. Egemendik alǵan kúnnen bastap Memleket basshysy Nursultan Nazarbaev elimizdiń bilim salasy jaqsy damýy úshin erekshe kóńil bólip keledi. Qandaıda bir daǵdarystar men qıynshylyqtar bolmasyn, memleketimizde bilim salasyn qarjylandyrý esh tómendegen emes, – deı kele Úkimet bas­shysynyń orynbasary Qazaq eliniń álemde aldyńǵy qatarly damyǵan 30 eldiń qataryna ený jolynda Elbasy bizdegi bilimdi jastar men tájirıbeli ǵalymdarǵa úlken úmit artyp otyrǵandyǵyn jetkizdi. Sonymen qatar, Vıse-premer Almaty qalasy damý jolyna túsken Qazaqstan úshin aıryqsha dárejege ıe ekendigin, mádenıet pen kásipkerliktiń ortalyǵy retinde áli talaı bıikterdi baǵyndyryp, otandyq ǵylym men bızneste tolaıym tabystarǵa qol jetkizetin jańa býyn ókilderin tárbıelep shyǵaratyndyǵyna senim artty. Úkimet tarapynan «Nurly Jol» memlekettik baǵdarlamasy aıasynda elimizde jańa mektepter salý úshin qarjynyń tolassyz bólinip otyrǵandyǵyn, 2020 jylǵa deıin elimizdegi barsha mektepterge Nazarbaev zııatkerlik mektepterindegideı zamanaýı jańa baǵdarlamany engizý, úsh maýsymdaǵy oqý júıesi men apatty jaǵdaıdaǵy mektepterdi jańa oqý ǵımarattaryn salý arqyly almastyrý sekildi birqatar mindetterdiń alǵa qoıylǵandyǵyn tilge tıek etti. Mektepke deıingi tárbıe máselesine qatysty Almaty qalasynyń ákimimen aqyldasa otyryp aldaǵy ýaqytta qalada boı kóteretin jańa sanatty turǵyn úılerdiń birinshi qabatynda balabaqshalar salý, 2020 jylǵa deıin qalada balabaqsha kezegin kútý problemasyn joıý máselelerimen keńeskendigin aıtty. Elimizdegi mektep jasyndaǵy jasóspirimder men balalardyń tárbıesine erekshe toqtalǵan Berdibek Saparbaev bala tárbıe isine erekshe kóńil bólý barshaǵa ortaq mindet ekendigine basa nazar aýdaryp, aýyldyq jerlerdegi bilim berý men aýyl mektepterin bitirip kelgen túlekterdiń erteńine udaıy alańdaýly bolýǵa, árbir qazaqstandyq shákirttiń erteńgi maman, el ekonomıkasy men saıasatyna orasan zor úles qosatyn tulǵa retinde qaraýǵa barlyq tárbıe isi ókilderin shaqyrdy. Premer-Mınıstrdiń orynbasary 2014-2015 oqý jylynda úlgili qyzmet atqarǵan muǵalimderdi Y.Altynsarın atyndaǵy mártebeli tósbelgimen marapattap, barsha ustazdar qaýymynyń eńbegine tabys tiledi. Almaty qalasyna arnaıy issaparmen kelgen Qazaqstan Respýblıkasy Premer-Mı­nıstriniń orynbasary Berdibek Saparbaev «Suńqar» tramplıninde, Balýan Sholaq atyndaǵy sport saraıynda, respýblıkalyq Qan ortalyǵynda bolyp, bolashaqta ýnıversıada ótkiziletin birqatar jańa sport nysandary men ǵımarattardyń daıyndyq jumystarymen tanys­ty. Qanat ESKENDIR, «Egemen Qazaqstan». ALMATY.