London bırjasynda Brent markaly munaı baǵasy 1 paıyzǵa arzandap, barreline 46,22 dollardy qurasa, al amerıkalyq WTI munaıy 0,85 paıyzǵa tómendep, barreline 40,97 dollarǵa quldyrady. Mundaı surypty otynǵa degen baǵanyń tómendeýi osymen ekinshi aıǵa sozylyp keledi.
Munaı baǵasynyń munshalyqty tómendeýi 1986 jyldan beri baıqalmaǵan-dy. Jyl basynan beri «qara altynnyń» eki markasy da 30 paıyzǵa arzandaǵan. Baǵanyń bulaısha tómen syrǵýy álemde óndirý kóleminiń artýymen, Irannan sanksııanyń alynyp tastalýymen jáne AQSh-taǵy munaı qorynyń ósýimen baılanystyrylyp otyr.
Jaǵdaı taǵy da ýshyǵa tústi
KHDR basshysy Kım Chen Yn eger Ońtústik Koreıa tarapynan shekara boıyndaǵy ashyq úndeýge arnalǵan daýys zoraıtqyshtardy óshirmese, onda sheptegi áskerı bólimshelerdiń «sheshimdi áskerı áreketke kóshýge» daıyndalýy kerektigi turǵysynda buıryq bergendigi belgili boldy. Mundaı buıryq eki el arasyndaǵy artıllerııalyq soqqy almasqannan keıin oryn alǵan.
Ázirge japa shekkender týraly naqty aqparat joq. Ońtústik Koreıa prezıdenti Ulttyq qaýipsizdik keńesin ótkizip, qazir el armııasy joǵary deńgeıli áskerı daıyndyq jaǵdaıyna keltirilip otyrǵan jaıy bar. Reti kelgende ashyq úndeýge arnalǵan daýys zoraıtqyshtardy iske qosý áskerılerdiń quzyryna ótkendigin aıta ketý kerek. Onyń ústine AQSh pen Ońtústik Koreıanyń birlesken áskerı jattyǵýlardy ótkizýi jaǵdaıdy ýshyqtyra túsken.
Bılik partııasy otstavkaǵa ketti
Grekııa prezıdenti ońshyl sentrıstik «Jańa demokratııa» partııasynyń lıderi Vangelıs Meımarakısıge jańa úkimet quramyn jasaqtaýǵa usynys jasamaqshy. Bul burynǵy premer-mınıstr Aleksıs Sıprastyń otstavkaǵa ketýimen baılanysty bolyp otyr. El konstıtýsııasy boıynsha ýaqytsha qyzmettik úkimetti úsh joǵary sottyń biri basqarýy tıis.
Negizinen el prezıdenti parlamenttik saılaý aldynda parlament senimine ıe bolatyn ózge partııa kósemderine úkimet jasaqtaý týraly usynys tastaı alady. Bul rette bıliktegi «SIRIZA» partııasy EOB, HVQ jáne Eýrokomıssııa tarapymen kelisimge qol qoıǵannan keıin oǵan eldiń senimi joǵala bastaǵan. Al partııa músheleri qatań únemdeýge arnalǵan «halyqqa qarsy qararǵa» qol qoıýǵa narazy bolǵan kórinedi.
Qysqa qaıyryp aıtqanda:
- «Islam memleketi» áskerı jasaǵynyń qatarynda JITS-pen aýyryp ınfeksııa juqtyrýdyń 16 jaǵdaıy anyqtalypty. Aýrý juqtyrǵandardyń bir bóligi jergilikti aýrýhanaǵa jatqyzylsa, qalǵan sodyrlardy top basshylary ózin ózi óltirýshiler qataryna qosqany málim boldy. Olar basyp alǵan aýmaqta kóp áıel alý jáne seksýaldyq quldyq degen uǵym saqtalyp keledi.
- Tokıodan Parıjge bet alǵan ushaqty Fransııa azamatynyń densaýlyǵy kúrt nasharlaýyna baılanysty ushaq Sheremetev áýejaıyna kelip qonady. Dárigerler álgi áıeldiń ómirin saqtap alyp qala almady.
- Úndistandyq áskerıler Dassault kompanııasy shyǵarǵan fransýzdyq Rafale áýe ushaǵyn satyp alýdan bas tartatyndyqtary belgili boldy. Onyń basty sebebi retinde áýe ushaqtarynyń tym qymbattyǵy atalýda. Endi úndilik áskerıler balama retinde reseılik Sý-30MKI shabýyldaýshy ushaqtaryn satyp almaq nıette ekendikterin bildirgen.
- Slovakııa aspanynda jolaýshylar tasymaldaıtyn «L-410» atty eki ushaqtyń soqtyǵysýynan jeti adam qaza tapty. Jerden 1,5 myń shaqyrym bıiktikte soqtyǵysqan ushaqta 40 adam bolýy kerek eken. Onyń barlyǵy da eki ushaqtyń apatyna deıin parashıýtpen sekirip úlgeripti.
AQSh prezıdenti Barak Obama kongress múshelerin eger Tegeran atomdyq baǵdarlama týraly kelisimdi buzǵan jaǵdaıda, AQSh ekonomıkalyq qysym kórsetýge, tipti, áskerı kúshti qoldanýǵa daıyn ekendigin jetkizipti. The New York Times basylymynyń habarlaýynsha, AQSh prezıdenti bul eskertýlerdi óziniń haty arqyly joldaǵan.
Osylaısha, Obama Iran men halyqaralyq araǵaıyndyq bolyp kele jatqan «altylyqtyń» arasyndaǵy kelisimdi qoldaý úshin senatorlardy sendirýge kúsh salypty. Bul rette ıadrolyq baǵdarlamaǵa ústimizdegi jyldyń 14 shildesinde Venada qol qoıylǵan-dy. Ondaǵy maqsat Irannan sanksııalar alynyp tastalyp, munaıyn álemdik naryqqa shyǵarý ekendigi málim.
Germanııadaǵy bosqyndar qaqtyǵysy
Germanııanyń ortalyq bóliginde ornalasqan bosqyndarǵa arnalǵan lagerde oryn alǵan qaqtyǵystan 17 adam japa shekti, olardyń altaýy polısııa qyzmetkerleri bolyp shyqty. Zýl qalasynda bolǵan bul qaqtyǵys bir aýǵandyqtyń Quran paraqshalaryn jyrtyp, dárethanaǵa tastaǵanynan órbigen. Tóbelesti toqtatpaq bolǵan polısııa qyzmetkerleri de soqqyǵa jyǵylǵan. Úsh saǵatqa sozylǵan qaqtyǵysty basý úshin ózge qalalardan da polısııa jasaqtary shaqyrtylypty. Reti kelgende Germanııadan saıası baspana alýǵa úmittilerdiń sany 800 myń adamnan asyp otyrǵandyǵyn aıta ketý kerek.Izraıl taǵy soqqy jasady
Izraıldiń áýe kúshteri Sırııa astanasy Damaskiden 40 shaqyrym jerdegi Kýmeıtra eldi mekeniniń ınfraqurylymy nysandaryn bombalaǵan. Oǵan sırııalyq aýmaqtan atylǵan zymyrandardyń sebep bolǵany aıtylady. Sonymen qatar, ızraıldik artılerrııa sırııalyq ásker tarapyna da oq jaýdyrypty.
Bul soqqydan eshkim zardap shekpese de, aıtarlyqtaı materıaldyq shyǵyn oryn alǵan. Sırııa aýmaǵynan atylǵan zymyrandardy esh tarap óz moıyndaryna almaǵanymen, Izraıl bul soqqylardyń Sırııa bıligi úshin kópke túsetinin eskertip otyr. Negizinen Damask pen Tel-Avıv arasyndaǵy jaǵdaıdyń ýshyǵýy Golland asýlaryn 1967 jyly alty kúndik soǵysta Izraıldiń tartyp alǵanynan beri jalǵasyp keledi.
Internet materıaldary negizinde ázirlendi.
