Ekonomıkalyq ıntegrasııany damytýǵa arnaldy

Premer-Mınıstrdiń birinshi orynbasary Baqytjan Saǵyntaev Máskeýde ótken Eýrazııalyq ekonomıkalyq komıssııa (EEK) Keńesiniń otyrysyna qatysty, dep habarlady Premer-Mınıstrdiń baspasóz qyzmeti. EEK Keńesi aıasynda Eý­r­azııalyq ekonomıkalyq odaqqa (EAEO) qatysýshy-memleketterdiń ekonomıkalyq ıntegrasııasyn damytýǵa baǵyttalǵan birqatar  aýqymdy máseleler talqylandy. Otyrys barysynda EAEO jáne Iran Islam Respýblıkasy arasynda erkin saýda aımaǵyn qurý týraly kelisim jasaýdyń qanshalyqty paıdaly ekendigi týraly máseleni jan-jaqty zertteý jóninde zertteý tobyn qurý týraly sheshim qabyldandy. Izraılmen erkin saýda aımaǵyn qurý týraly kelissózderdi bastaý múmkindigi týraly másele de talqylandy. Sonymen birge, Eýrazııalyq eko­nomıkalyq komıssııaǵa Ko­reı Respýblıkasymen saýda-ekonomıkalyq yntymaq­tastyqty damytýdyń bolashaǵyn zertteý maqsatynda ǵylymı-zertteý jumysyn júrgizý tapsyryldy. Ártúrli eldermen yntymaq­tastyq baılanysty keńeıtý EAEO memleketteriniń syrtqy saýda qurylymyn ártaraptandyrýǵa jáne onyń kólemin keńeıtýge úmit artýǵa múmkindik beredi. Sonymen birge, otyrys barysynda Odaqqa múshe memleketter jáne EEK arasynda úshinshi tarappen halyqaralyq saýda boıynsha kelispeýshilik máseleleri týǵan kezde ózara yntymaqtastyq baılanys jasaý máseleleri qaraldy. Mundaı ózara yntymaqtastyq baılanys saýda máselesi boıynsha daý-damaı bolǵan kezde EAEO memleketteriniń múddesin qorǵaýdyń tıimdiligin arttyrady. О́nimniń qaýipsizdigi jónin­degi mindetti talaptardy belgi­leýge qatysty biryńǵaı kózqaras qalyptastyrý úshin EAEO teh­nı­kalyq reglamentiniń qurylymdyq túri jáne mazmuny boıynsha usynystar maquldandy. Sonymen birge, ulttyq ón­dirýshiler men tutynýshylardyń múddesin qamtamasyz etýge baılanysty jekelegen kedendik-tarıftik retteý máseleleri qaraldy. Jalpy alǵanda, EEK keńesiniń májilisine qatysýshylar Máskeýde ótken kezdesýler barysynda Eýrazııalyq ekonomıkalyq ıntegrasııany damytýdyń ózekti máseleleri boıynsha ózara tıimdi sheshimder tapty.   «Egemen-aqparat».