Brýneı-Darýssalam astanasy – Bandar-Serı-Begavan qalasynda BUU Qaýipsizdik Keńesine Qazaqstannyń kandıdatýrasyn ilgeriletý jónindegi Elbasynyń arnaıy ókili – Syrtqy ister mınıstriniń orynbasary Asqar Mýsınov sultanattyń Syrtqy ister jáne saýda mınıstri, hanzada Mohamed Bolkıahpen kelissóz júrgizdi.
A. Mýsınov BUU Qaýipsizdik Keńesine 2017-2018 jyldarǵa turaqty emes múshelikke Qazaqstannyń kandıdatýrasyn qoldaý boıynsha Prezıdent N.Á.Nazarbaevtyń Brýneı Sultany Hassanal Bolkıahqa joldaǵan jeke hatyn tabystap, Qazaqstan saılanǵan jaǵdaıda, beıbitshilik pen qaýipsizdikti, adam quqyǵyn, zań ústemdigin jáne turaqty damýdy nyǵaıtýǵa bar kúsh-jigerin salatynyn habarlady.
Kezdesý barysynda qazaqstandyq dıplomat Qazaqstan bastamasymen Islam yntymaqtastyǵy uıymy (IYU) sheńberinde qurylǵaly otyrǵan Azyq-túlik qaýipsizdigi jónindegi ıslam uıymyna (AQIU) Brýneıdiń jaqyn arada qosylatynyna senim bildirdi.
«Bandar-Serı-Begavannyń AQIU jumysyna qosylýy IYU keńistigindegi jáne jalpy álem boıynsha azyq-túlik qaýipsizdiginiń ózekti máselelerin sheshý jolynda jańa múmkindikter ashady», – dep oıymen bólisti A.Mýsınov.
Brýneı-Darýssalam Syrtqy jáne saýda mınıstri Qazaqstan tarapynyń ótinishteri muqııat zertteletinine sendirip, elimizben yqpaldastyqty, sonyń ishinde kópjaqty pishimde damytýǵa múddeli ekenin jetkizdi.
Sol kúni A.Mýsınov Brýneı-Darýssalam Syrtqy jáne saýda ekinshi mınıstri Lım Djok Sengpen kezdesip, Qazaqstan men Brýneı arasyndaǵy ekijaqty yntymaqtastyqty belsendilendirý joldary men múmkindikterin talqylady.
A.Mýsınov Qazaqstandaǵy saıası jáne áleýmettik-ekonomıkalyq jaǵdaı jáne elimizdiń halyqaralyq bastamalary týraly baıandap berdi.
Lım Djok Seng Qazaqstannyń táýelsizdik alǵaly beri qol jetkizgen tabystaryna joǵary baǵa berip, arnaıy ókildiń Brýneıge saparmen kelgenine alǵysyn bildirdi, bul sapar Qazaqstannyń BUU Qaýipsizdik Keńesine múshe bolýǵa zor nıetin tanytatynyn atap ótti.
«Egemen-aqparat».
