Álemge taraıtyn áýen

Jaqyn arada AQSh-tyń klassıkalyq radıosynyń áýe tolqynynda qazaq mýzykasy oryndalatyn boldy. Halyqaralyq yntymaqtastyq jáne tájirıbe almasý maqsatynda «Classical KUSC» (Los-Andjeles, AQSh) radıo­stansasynyń bas mamandary Brenda Barners (Ońtústik Kalıfornııa ýnı­versıtetiniń radıo jáne «Classical KUSC» prezıdenti) jáne Krıstofer Mendez (zamanaýı tehnologııalar mamany) Almatydaǵy «Classic» radıosynda («Qazaqstan» respýblıkalyq teleradıokorporasııasynyń quramyna kiredi) qonaqta bolǵanda osy máselege oraı jýrnalısterge óz pikirlerin bildirdi. «KUSC» radıosynyń prezıdenti Brenda Barns: «Bul radıo men kórgen klassıkalyq mýzykanyń úzdik radıo­larynyń biri. Sizdermen tanysyp, ári uzaq merzimdi áriptestikke qol jetkiz­genimizge qýanyshtymyz. Qa­la­nyń kórikti jerlerin aralap, jaqsy áserge bólengen jaıy­myz bar. Bizge qazaq halqynyń qonaqjaılyǵy, kásibı qarym-qabileti unady. Qa­zaq­stannyń qazirgi tabys­tary­na tańǵalmasqa lajyń joq», dep aǵynan jaryla áńgimeledi. Al, «Classic» radıosynyń dırektory Raýshan Ju­manııazova áriptesiniń pikirine oraı  «Los-Andjelestik áriptesterimizben kezdesýimiz sát­ti ótti. Biz kóptegen paıdaly aqpa­ratqa qol jetkizdik. Eń bastysy, Los-Andjeleste, San-Fransıskoda, Santa-Barbarada, Santa-Klarıta men Palm-Sprıngsta, Taýzend-Oýkstte qazaq mýzykasyn, bizdiń kompozıtorlar men oryndaýshylardyń ónerin áýe tolqynynda taratatyn turaqty baǵdarlama týraly kelisimge qol jetkizdik. Qazaq áýeniniń áýe tolqyny arqyly álemge pash etilýi biz úshin óte mańyzdy», dep atap kórsetti. Ekijaqty kezdesýler klassıkalyq mýzyka formatynda habar taratatyn radıonyń ereksheligi týraly máselelerge, mádenıet pen óner­di damytýǵa, jańa medıaǵa arnal­dy. Talqylaýǵa, sondaı-aq «Qazaq­stan» RTRK ınternet redaksııa bó­liminiń qyzmetkerleri jáne Qurman­ǵazy atyndaǵy Qazaq ulttyq konser­vatorııasynyń stýdentteri qatysty. Aıta ketý kerek, «Classic» radıosy habar taratýy tolyǵymen túrli janrdaǵy jáne ulttyq mektepterdiń akademııalyq mýzykasyna negizdelgen biregeı radıostansa bolyp tabylady. Bul – Qazaqstan aýmaǵyndaǵy klassıkalyq mýzykanyń tuńǵysh jáne jalǵyz radıostansasy. Radıo 2011 jyldyń 6 maýsymynan bastap jumys isteıdi desek, qazirgi ýaqytta eki iri qalada, Almaty (102,8 FM) men Astanada (102,7 FM) habar taratýda. Sondaı-aq, «Classic» radıosy álem boıynsha barlyq áriptesterimen tyǵyz qarym-qatynasta qyzmet etedi. Ásirese, Mıýnhenmen («BR-klassik») jáne Máskeýmen («Orfeı») jasalǵan yntymaqtastyq tabysty jalǵasýda. Al, «BBC 3» (London) jáne «Radio Classique» (Parıj) radıostansalarymen yntymaqtastyq qarym-qatynastar munan da aýqymdy baǵytta damyp keledi. «Classical KUSC» radıosyna kelsek, AQSh-taǵy klassıkalyq mýzykanyń iri qoǵamdyq radıostansasy bolyp tabylady. KUSC-tiń negizgi mindeti klassıkalyq mýzykanyń Ońtústik Kalıfornııa turǵyndary ómiriniń ajyramas bólshegi retinde saqtap qalý jáne damytý bolyp tabylady. Radıostansanyń tarıhy 60 jyldy qamtıdy. Raýan ESQALI.