Qazaqstannyń Cheh Respýblıkasyndaǵy elshisi Serjan Ábdikárimov Cheh Respýblıkasynyń Prezıdenti Mılosh Zemanǵa Senim gramotasyn tapsyrdy.
Saltanatty rásimnen keıin M.Zemannyń 2014 jyly qarashada Qazaqstan Respýblıkasyna resmı sapary sheńberinde qol jetkizilgen ýaǵdalastyqtar boıynsha ekijaqty kelisimderdiń iske asyrylýy talqylandy. Chehııa Prezıdenti Elbasy N.Á.Nazarbaevqa óziniń jyly sálemin joldady. Elshi Qazaqstan Chehııamen qarym-qatynastardy jan-jaqty damytýǵa zor kóńil bólip, Ortalyq Eýropadaǵy mańyzdy seriktesi retinde baǵalaıtynyn aıtty. Ol Chehııa basshysyn Qazaqstannyń «Nurly Jol» baǵdarlamasy negizinde áleýmettik-ekonomıkalyq jáne saıası-qoǵamdyq damý qarqyny, Elbasynyń bes ınstıtýttyq reformasy, Qazaq handyǵynyń 550 jyldyǵy men Álemdik jáne dástúrli dinder kóshbasshylarynyń V sezi týraly habardar etti. Dıplomat resmı Astananyń Pragamen ózara tıimdi ekijaqty jáne kópjaqty pishimde sonymen qatar, Eýrazııalyq ekonomıkalyq odaq pen Eýropalyq odaq arasyndaǵy únqatysýdy damytýǵa daıyn ekenin atap ótti. M.Zeman Qazaqstannyń saıası jáne áleýmettik-ekonomıkalyq jańǵyrtý jolyndaǵy jetistikterin, aımaqtyq jáne halyqaralyq qaýipsizdik salasyna qosqan eleýli úlesin joǵary baǵalady. Chehııa basshysy óz memleketiniń Astanada ótetin EKSPO-2017 halyqaralyq kórmesine qatysý nıetin rastady. Chehııa Prezıdenti elshini resmı taǵaıyndalýymen quttyqtap, aldaǵy eki el ıgiligine baǵyttalǵan qyzmetine tabys tiledi.
«Egemen-aqparat».
