Baıqaý úderisi qadaǵalanady

Keshe «Qazmedıa ortalyǵynda» eldegi prezıdenttik saılaýdy baıqaý úderisine  ázirlik sheńberinde «Baıqaýshynyń quqyqtary men mindetteri. Saılaýdy baıqaýshynyń qyzmetindegi ádis-tásilder»  taqyrybynda semınar-trenıng ótti.    Is-sharany Qazaqstan Respýblıkasynda saılaýdy baıqaý jónindegi respýblıkalyq qoǵamdyq komıssııa (SBRQK) uıym­dastyrdy. Semınar-trenıngke L.N.Gý­mı­lev atyndaǵy EUÝ saıasattaný kafedrasy  professorynyń mindetin atqarýshy Marına Onýchko, SBRQK múshesi Talant Ramazanov jáne SBRQK múshesi Shyńǵys Lepsibaev qatysyp, mundaı sharalar barysynda baıqaýshylarǵa qoıylatyn negizgi talap-mindetter men quqyqtar aıqyndalyp, jaýapkershilikter belgilenetinin atap ótti. Máselen, Talant Ramazanov saıası naýqan kezinde árbir saılaýshy Konstıtýsııa men Saılaý týraly zańnamadaǵy erejeler men normalardy qatań saqtaýy tıistigin, al baıqaýshy saılaý úderisine bóget jasamaı, barlyq úderistiń zańnamalarǵa sáıkes júrgizilýin qadaǵalap otyrýy qajettigin jetkizdi. Shyńǵys Lepsibaev saılaý kezinde kezdesetin túrli qarama-qaıshylyqtarǵa, ákimshilik zań buzýshylyqtarǵa toqtalyp, olardy boldyrmaý men aldyn alýdyń joldaryn aıtyp berdi. Al Marına Onýchko mundaı semınarlardyń negizgi maqsaty – Saılaýdy baıqaý jónindegi respýblıkalyq qoǵamdyq komıssııanyń mıssııasy men mindetterin biryńǵaı túsinýdi qalyptastyrý jáne baıqaý úderisin jetildirý ekenin atap ótti. Bul kúngi shara barysynda baıqaýshylardyń saılaý úderisindegi sheshýshi róli,  baıqaý  úderisinde aqparattyq tehnologııalardy qoldaný sekildi máseleler qaraldy. Sondaı-aq, saılaýdyń halyqaralyq standarttary men 2011 jáne 2012  jyldardaǵy saılaý naýqanynda SBRQK-nyń qyzmet tájirıbesine taldaý júrgizildi. Láıla EDILQYZY, «Egemen Qazaqstan».