Qujattarǵa til bitse...

Elimizdiń Ulttyq muraǵaty «Qazaqstan Respýblıkasynyń Ata Zańyna – 20 jyl» atty qujattyq kórme uıymdastyryp, onyń alǵashqy qonaqtarynyń qatarynda Konstıtýsııany daıyndaýdyń basy-qasynda júrgen jumys tobynyń músheleri de boldy. El tarıhyn qattap jatqan Ulttyq muraǵat bilgen janǵa elordadaǵy qasıetti orynnyń biri. Mundaǵy tarıhı qujattar qory áli talaı zertteýshiniń indetip qazyp, talaı-talaı ǵylymı-zertteý jumystardyń derekkózine aınalyp, keýdesine shejire toqyǵysy kelgen talaı jannyń azyǵy bolary anyq. Osy joly tarıhı qujattardy, derekterdi eldiń kóz aldyna alyp kelgen muraǵattyqtar 20 jylǵy tarıhty sóıletýdi murat tutypty. Áldeqandaı bir kóshirme emes, tarıhı qujattardyń túpnusqalary qoıylǵan kórme árbir kelýshini mazmundylyǵymen baýraıdy. Kórmeden qoǵam men memlekettiń Negizgi Zańynyń daıyndalý barysy men qabyldanýynan tarıhy syr aqtarylǵanda, qujattarmen tanysqan kórermen úshin ony ázirleýge qatysqandardyń alǵan áserlerin kórý de bir ǵanıbet boldy. Sol kezeńderdi esine alǵan Zınaıda Fedotova: «1995 jyly Konstıtýsııany ázirleý barysyna biz sol kúnniń memlekettik mereke bolatynyn árıne, bilgen joqpyz. Shynynda bul – uly mereke. 20 jylda elimiz orasan zor tabystarǵa jetti. Osy jyldar ishinde Ata Zańnyń aıasynda bizdiń qoǵamymyz da ósip-jetildi, sondyqtan elimiz úshin bul merekeniń orny bólek», dep tolqysa, muraǵat basshysy Marat Ábsámetov Ata Zańǵa baılanysty qujattardy kópshilik nazaryna usyna otyryp bizder onyń Qazaqstannyń damýyna, áleýetiniń artýyna qosqan ólsheýsiz úlesin kórsetkimiz keldi, «Konstıtýsııamyzdyń arqasynda halqymyzdy álem elderi tanydy. Qazaq halqy osy qalpynda kókten túse qalǵan joq, ol tarıhtyń kóshinde óz ornyn alǵan halyq. Talaıdy bastan keshirip, arman etken memleketin quryp, Ata Zańyn basshylyqqa alyp, kópetnosty jurtty bir tý astyna  biriktirgen el. Sondyqtan babalarymyzdyń muratyna jetkenin búgingi urpaqtary kórip otyr», dedi. Muraǵattyń birneshe qorynyń, atap aıtqanda, Qazaqstan Respýblıkasynyń Konstıtýsııasy, Joǵarǵy Keńes, Ortalyq saılaý komıssııasy, Úkimet apparaty, Konstıtýsııalyq sotynyń qundy qujattary kórme sórelerinen oryn alypty. Ony aralaǵan jan Ata Zańnyń búkilhalyqtyq talqylaýdan qalaı ótkeninen, referendýmnyń ázirlik barysy men onyń ótkizilýinen, osy jyldar ishinde basty zańymyzǵa engizilgen ózgerister men tolyqtyrýlardyń qalaı júzege asyrylǵanynan da habardar bolady. Kórmeniń ashylý rásimine memleket jáne qoǵam qaıratkerleri, Konstıtýsııany daıarlaý boıynsha jumys tobynyń músheleri, Parlament depýtattary, Mádenıet jáne sport mınıstrliginiń ókilderi, tarıhshy ǵalymdar men muraǵatshylar qatysty. Astanalyqtar men qonaqtarynyń tarıhı túpnusqa qujattar qoıylǵan kórmeni qyrkúıek aıynyń sońyna deıin tamashalaı alatynyn eske sala ketý de artyq etpes. Anar TО́LEÝHANQYZY, «Egemen Qazaqstan».