Reseılikterdiń jartysy Stalınniń qýǵyn-súrginin aqtap shyqty

ASTANA. 2 sáýir. «Levada» ortalyǵy júrgizgen saýalnama nátıjesi boıynsha, Reseı halqynyń jartysyna jýyǵy (45 paıyzy) Stalınniń qýǵyn-súrgin saıasatyn aqtap shyqty. Bul týraly interfax.ru habarlady. Olar solaqaı saıasattyń arqasynda uly maqsattar oryndalyp, bıik belesterdi baǵyndyrdyq dep sanaıdy. Al 41 paıyzy jazyqsyz jandardy jappaı qyryp-joıǵan júıeni eshqashan aqtap alýǵa bolmaıtynyn aıtqan. Sonymen qatar saýalnamaǵa qatysýshylar Stalınniń ólimi týraly da óz pikirlerin bildirdi. Olardyń 46 paıyzy Iosıf Vıssarıonovıchtiń ólimin halyqty jappaı qýǵyn-súrginge dýshar etken lańkestik oqıǵanyń aıaqtalýy dep sanaıdy. Al 24 paıyzy halyq uly kósemi men ult ustazynan aıyryldy degen. Áleýmettanýshylardyń aıtýynsha, Reseıde Stalın týraly jaqsy pikirdegi jandar 39 paıyzdy quraıdy. Sondaı-aq, sońǵy 15 jylda burynǵy KSRO basshysyn jek kórýshilerdiń qatary azaıǵan. Máselen, ony jaýyz sanaıtyndar 2001 jyly 27 paıyzdy qurasa, qazir mundaı jandar 14 paıyzǵa ǵana jetedi. Odan bólek, reseılikterdiń 6 paıyzy áli kúnge Stalınniń atyn estise, qorqatyndaryn aıtqan. Degenmen, munyń ózi 2001 jylmen salystyrǵanda 10 paıyzǵa azaıǵan. Ýaqyt ótken saıyn Stalın týraly derekterge esh qyzyqpaıtyn halyqtyń qarasy artyp keledi. Osydan 14 jyl buryn bul kórsetkish 12 paıyzdy qurasa, búginde reseılikterdiń 30 paıyzy burynǵy basshylary týraly málimetterge asa mán bermeıtinin aıtqan. Elaman Qońyr. Derek: interfax.ru. Sýret: haqqin.az.