Ánshiler áýleti

24 nemere, 24 shóbere súıgen Nurǵazıevtardyń nurly shańyraǵy Memleket basshysy Nursultan Nazarbaevtyń tapsyrmasy boıynsha elimizde otbasy qundylyqtaryn dáripteý maqsatynda «Mereıli otbasy» baıqaýy bıyl ekinshi márte uıymdastyrylyp, jýyrda atalǵan baıqaýdyń óńirlerdegi jeńimpazdary belgili bolǵany málim. Shyǵys óńirinde ótken «Mereıli otbasy» baıqaýynda úzdik úshtikten kóringen áýlettiń biri – Nurǵazıevtar otbasy. Áýlettiń ıeleri Qısa Nur­ǵa­­zıuly men Sandýǵash Keńis­paıqyzy otasqandaryna jarty ǵa­syrdan astam ýaqyt bolyp, dáli­rek aıtqanda 52 jyl boıy qol ustasyp, ómirdiń úlken belesinen ótken abzal jandar. Qısa qarııa osydan on shaqty jyl buryn ómirden ótse, Sandýǵash ana seksenniń seńgirinen asyp, bala-shaǵasynyń qyzyǵyn kórip otyr. Altaıdyń baýraıyndaǵy Úlken Naryn aýylynda turady. Baqytty da baraqatty shańyraqtyń bastaýynda turǵan bul áýlettiń anasy búginde 11 bala tárbıelep, 24 nemere, 24 shóbere súıip otyr. Sandýǵash Keńispaıqyzy Keńes Odaǵynyń kezinde «Batyr Ana» ataǵyn alsa, táýelsizdik jyldary Elbasynyń qoly qoıylǵan «Altyn alqa» ıegeri boldy. «Balaly úı bazar» degendeı, ishki ister organdarynda 32 jyl boıy eńbek etken áýlettiń ákesi Qısa qanatymen sý sepken qarlyǵashtaı, barlyq balany jalǵyz eńbekaqysymen eshkimnen kem qylmaı, tárbıelep jetkizse, jan jary Sandýǵash kúıeýiniń qıyn da jaýapty qyzmetin abyroımen alańsyz atqarýyna bolysyp, úıde bala tárbıesimen aınalysty. Áke-sheshemizdiń ánge degen áýestigi men qumarlyǵy barlyq balalaryna qondy. Ásirese, uldar áke jolyn laıyqty jalǵastyryp, joǵary bıikterdi baǵyndyrdy. Máselen, Murat Qurmanǵazy atyndaǵy Qazaq ulttyq konservatorııasyn bitirdi. «Qazaqstannyń eńbek sińirgen qaıratkeri» atandy. Áli kúnge tabıǵat tartý etken dara daýysymen konsertterde tyńdarmandardyń qulaq quryshyn qandyryp keledi. Prezıdent orkestriniń ánshisi bolyp eńbek etti. Podpolkovnık shenindegi Murat qazir qurmetti demalysta. Qaırat pen Bolat ta aǵa izimen júrip, О́skemen qalasyndaǵy mýzykalyq ýchılısheni támamdady. Qaırat aýdandyq mádenıet úıinde 30 jyl jumys istedi. Qaırattyń jary Darıǵash ta, qyzy da ánshi. Áıeli qazir balabaqshada ádisker bolyp eńbek etse, qyzy Mádenıet úıinde jumys istep júr. Tyńdarmandary talanttaryna bas ıedi. Al Asqar mýzykalyq bilimi bolmasa da, án salǵandy aıryqsha unatady. Tipti, ózi jazǵan ánderi de bar. Ol ózin memlekettik qyzmet salasynda synap kórdi. Uzaq jyl boıy О́skemen qalasynyń ákimdiginde eńbek etti. Qala ákiminiń orynbasary qyzmetin atqardy. Qazirgi kezde oblystyq bilim basqarmasynyń jetekshisi bolyp eńbek etedi. Qyzdar da ózderin jaqsy qyrlarynan tanytty. Gaýhar kóptegen jyldar boıy basshylyq qyzmetter atqardy. Katonqaraǵaı aýdandyq máslıhatynyń hatshysy bolyp eńbek etti, «Zeınetaqy qorynyń eńbek sińirgen qyzmetkeri» atandy. Basqa balalar da ómirden óz joldaryn tapty. Olar búginde bilim, saýda, telekommýnıkasııa syndy túrli salalarda eńbek etýde. Dýman ANASh, «Egemen Qazaqstan». Shyǵys Qazaqstan oblysy, Katonqaraǵaı aýdany.