Der kezinde qabyldanyp otyr

Keshe Ortalyq kommýnıkasııalar qyz­metinde Ortalyq Azııa boıynsha Dúnıejúzilik banktiń bas ekonomısi Krıstos Kostopýlos pen «Ekonomıkalyq zertteýler ınstıtýty» AQ-tyń prezıdenti Maqsat Muqanov baspasóz máslıhatyn ótkizdi. Onda Qazaqstannyń jańa ekonomıkalyq saıasatqa qadam basqany men teńgeniń erkin aınalymǵa shyqqany sóz boldy. Qazaqstannyń jańa aqsha-nesıe saıasatyna qadam basyp, teńgeni erkin aınalymǵa jibergenin óz basy quptaıtynyn bildirgen Dúnıejúzilik banktiń bas ekonomısi, buqaralyq aqparat quraldarynyń ókilderimen kezdesip emin-erkin áńgimelesýge múmkindik jasaǵan OKQ qyzmetkerlerine alǵysyn bildirdi. Sóıtip, munaı baǵasynyń tómendeýi men Qazaqstan ekonomıkasynyń damý úrdisteri týraly birneshe slaıdtar ákelgenin, sondyqtan sol dáleldemeler boıynsha sóz órbitetinin aıtty. Qazirgi jańa aqsha-nesıe saıa­saty ulttyq kiristiń shynaıy tómendeýin eskeredi. «Qazaqstan Úkimetiniń bul ózgertýleri eki jaǵdaıǵa baılanysty ekeni belgili. Birinshiden, munaı baǵasynyń tómendeýi. Ol aıtarlyqtaı deńgeıge quldyrady. Bul tek sizderdiń elderińizdi ǵana emes, álemdegi kóptegen memleketterge ulttyq valıýtalary boıynsha túrli sharalar qabyldaýǵa mindettedi. Ekinshi jaǵdaı, Reseı men Qytaı ekonomıkasynyń kúrt ózgerýi. Olar Qazaqstannyń saýda-sattyqtaǵy eń mańyzdy seriktesteri bolyp sanalady», dedi K.Kostopýlos. Mamannyń pikirine júginsek, Reseı rýbliniń quldyraýy men Qytaı ekonomıkasynyń damý qarqynyń tómendeýi Qazaqstandy óz ekonomıkasynyń básekege qabilettiligin arttyrý baǵytynda sharalar qabyldaýǵa ıtermelep otyr. Munymen birge, Qazaqstannyń jańa aqsha-nesıe saıasaty el ekonomıkasy kirisiniń shynaıy tómendeýin eskeretindigin aıtyp ótti. Dese de, munaı baǵasynyń naryqta orta merzimdi tómendeýiniń kútilýi bul saıasatqa da túzetý engizýi ǵajap emes eken. «Eger munaı baǵasyn qaperge alar bolsaq, teńgeniń aıyrbas baǵamy birshama tómen bolýy tıis. Sondyqtan, bul shara teńgeniń erkin aıyrbas baǵamy munaı baǵasy ózgergen kezdegi naryqtaǵy baǵa emes, teńgeniń baǵasyn ózgertýge baǵyttalǵan qadam. Ulttyq kiristerdegi ózgeristerge oraı ekonomıka qurylymy da barynsha básekege qabiletti bolýy úshin osylaı ózgeriske ushyraýy qajet», dedi bas ekonomıst. Kórshi Reseı men Qytaı elderiniń ekonomıkalyq jaǵdaıynyń tym kúrdeli bolyp turǵanyna toqtalǵan «Ekonomıkalyq zertteýler ıns­tıtýty» AQ-tyń prezıdenti M.Muqanov, qazirgi qıyndyqtardan shyǵýdyń joly «100 naqty qadam» Ult jospary ekenin aıtty. Onyń ishinde otandyq bıznesti qoldaý sharasy úlken mańyzǵa ıe ekenin taratyp berdi. «Eýropanyń damyǵan elderiniń tájirıbesine qarasaq, olar ekonomıkalyq daǵdarystardan jergilikti kásipkerlikterdi qoldaý arqyly shyǵyp otyrǵan. Ásirese, básekege qabiletti kásiporyndardyń bıznesin keńeıtip, tabysyn ulǵaıtýǵa múmkindik jasaǵan. Qazirgi ár tutynatyn taýarǵa básekelestik artyp otyrǵan zamanda bul shara óte tıimdi ekenine daý joq. Sondyqtan, Qazaqstan da básekelestikke tótep bere alatyn kásiporyndardy iriktep, olardyń erkin qımyldaýyna jaǵdaı týdyrýda. Bul degenimiz, jańa jumys oryndarynyń ashylýyna septigin tıgizip, jumyssyzdar sanynyń azaıýyna áser etpek», dedi ǵalym. Nurbaı ELMURATOV, «Egemen Qazaqstan».