Qoshqarbaı qorymynyń jádigerleri

Aqmola oblystyq arheologııalyq ekspedısııasy Zerendi aýdanynyń Keńótkel aýylyna jaqyn ornalasqan jerde kezekti jumysyn bastady. О́ńir tórindegi Qoshqarbaı qonysy erekshe tarıhı-mádenı aımaq bolyp sanalady. Munda 150-den asa arheologııalyq nysan bar. Osynda tabylǵan qundy jádigerler ártúrli kezeńdegi, qola dáýirinen orta ǵasyrǵa deıingi tarıhty sıpattaıdy. Tarıhı-mádenı murany qorǵaý jáne paıdalaný ortalyǵynyń mamandary jádigerler sanynyń kóptigin óńir tabıǵatynyń adamdar úshin ómir súrýge qolaılylyǵymen túsindiredi. О́zen-sýdyń moldyǵy, mal jaıylymynyń keńdigi men tabıǵı-klımattyq jaǵdaıdyń durystyǵy ómir kóshiniń artyqshylyǵyn qamtamasyz etkeni anyq. Munda toqyma, qysh ydystar men áshekeı buıymdar jasaý, mal sharýashylyǵy aıryqsha damyǵan. Mysaly, bıylǵy on kúndik jumys kúninde ǵana Qoshqarbaı qorymynan adam súıeginiń qańqasy, qola buıymdar, túrli áshekeıler men alqalar tabylyp otyr. Sondaı-aq, úlken olja retinde alakól jáne andronov kezeńine jatatyn tórt ydysty aıtýǵa bolady. Ortalyq dırektory Talǵat Ybyraev­tyń aıtýynsha, erte dáýirdegi adamdar qaıtys bolǵannan keıingi ómirdiń bar­lyǵyna sengen. Sondyqtan, jerleý rásimi qurbandyq shalýmen qatar júrgizilgen. Iаǵnı, marqumdar áshekeı, turmystyq zattar, ydys-aıaqtarmen birge kómilgen. Búgingi jádigerler osy paıymdaýdy rastaı túsedi. Jalpy, Qoshqarbaı qorymyndaǵy 6 arheologııalyq nysannan 38 artefak, 30 qola buıym men 8 qysh ydys anyqtalyp, mádenı-tarıhı ıgiligimizge jaratylýda. Al, úsh mura boıynsha qaıta qalpyna keltirý jumystary júrgizildi. Ekspedısııa jumysyna Sh.Ýálıhanov atyndaǵy Kókshetaý memlekettik ýnı­ver­sıteti men A.Myrzahmetov atyn­daǵy ýnı­versıtettiń stýdentteri men Krasnyı Iаr aýylynyń №2 mektebi men «Áýlet» synyp­tan tys jumys orta­ly­ǵynyń oqý­shylary, ıakýtııalyq mamandar qatysýda. Baqbergen AMALBEK, «Egemen Qazaqstan». Aqmola oblysy, Zerendi aýdany. Sýrette: qazba jumysy bary­syn­daǵy tabylǵan qysh ydystar.