Senatorlar saılaýshylar arasynda

Parlament Senatynyń depýtaty Jabal Erǵalıev Kókshetaý qalasynyń áleýmettik-ekonomıkalyq jaǵdaıymen tanysyp, shaǵyn kásipkerlik jáne densaýlyq saqtaý nysandaryn aralady, eńbek ujymdarynda eńbekkerlermen kezdesti, dep habarlady Senattyń bas­pasóz qyzmeti. Qala ákimi Ermek Marjyqpaev oblys ortalyǵyndaǵy ıgilikti ister týraly senatordy habardar etti. Kókshetaý qalasynyń ekonomıkasy nyǵaıa túsýde, ónerkásip óndirisiniń kólemi ulǵaıyp, turǵyn úı qurylysy artty, halyqty jumyspen qamtamasyz etý kórsetkishteri joǵarylady. Senator «Aqmola Bıdaı» JShS-de boldy. Onyń basshysy, Aýǵanstannan qonys aýdaryp kelgen Abdýl Halıl Nadjıbýlla Elbasynyń otandastaryna degen qamqorlyǵyna oraı alǵysyn bildirdi. J.Erǵalıev sondaı-aq, «NovoPek» kásipor­nyndaǵy tehnologııalyq kezeńdermen tanysty jáne «Avısenna» emdeý ortalyǵynda boldy. Depýtat, sondaı-aq, «Nur Otan» partııa­synyń Aqmola oblystyq bólimshesi uıym­dastyrǵan «Baqytty balalyq» jobasy aıasyndaǵy «Mektepke jol» sharasyna da qatysty. Oblystyq jáne qalalyq máslıhattyń depýtat­tary óz qarjylarynan az qamtylǵan otbasylardyń balalaryna arnalǵan kómek berdi. Halyq qalaýlylary 49 oqýshyǵa 1 mıllıon teńge kóleminde sertıfıkat berdi. Senator J.Erǵalıevtiń aqshalaı sertıfıkaty Kókshetaý qalasyndaǵy №21 orta mekteptiń oqýshysyna tabys etildi. Senator sapar aıasynda Aqmola oblysynyń Zerendi aýdandyq máslıhatynyń kezekti 38-shi sessııasyna qatysty. Sessııada sóz alǵan J.Erǵalıev Prezıdent N.Á.Nazarbaevtyń Qazaqstan halqyna arnaǵan «Nurly Jol – bolashaqqa bastar jol» Joldaýynyń tarıhı mańyzyna toqtaldy. Qazirgi damý kezeńinde álem jańa qaterdiń – jahandyq qarjy daǵdarysynyń aldynda tur, – dedi senator óz sózinde. Elbasy  ekonomıkanyń kez kelgen daǵdarysyna daıyn bolýǵa, odan qýatty memleketter men birligi men yntymaǵy myqty elder ǵana shyǵa alatyndyǵyn udaıy eskertip keledi. Bizde elimizdiń qarqyndy damýyna arnalǵan naqty josparlar men baǵyttar bar. Solardyń ishindegi mańyzdy baǵdarlamanyń biri «bes ınstıtýttyq reformany iske asyrý jónindegi 100 naqty qadam» bolyp otyr, dep atap ótti senator. * * * Parlament Senatynyń depýtaty, Áleýmettik-mádenı damý jáne ǵylym komıtetiniń múshesi Serik Bekturǵanov Qostanaı oblystyq basqarmasynyń birqatar qyzmetkerlerimen kezdesti, dep habarlady Parlament Senatynyń baspasóz qyzmeti. Senator elimizdiń áleýmettik salasynyń damý keleshegi, Parlament qabyldaǵan zańdar jáne Memleket basshysynyń bes ınstıtýttyq reformasyn iske asyrý jónindegi josparlanǵan zań shyǵarý jumystary týraly áńgimeledi. Kezdesýler barysynda aımaqtyń ózekti máseleleri, atap aıtqanda, jergilikti atqarýshy organdar men salalyq mınıstrlikter ara­syndaǵy ózara is-qımyly talqyǵa salyndy. * * * Parlament Senatynyń depýtaty Jabal Erǵalıev Aqmola oblysynyń Jaqsy aýdandyq máslıhatynyń kezekti 38-shi sessııasyna qatysty, dep habarlady Senattyń baspasóz qyzmeti. Jaqsy aýdanynyń ákimi Qanat Súıindikov «Bıznestiń jol kartasy-2020» baǵdarlamasyna sáıkes aýdanda 918,2 mıllıon teńgeniń ınvestısııalyq jobalary júzege asyrylyp jatqanyn, bul ótken jylmen salystyrǵanda 3,2 paıyzǵa artyq ekenin aıtty. Shaǵyn jáne orta kásipkerlik damı túskeni anyq baıqalady. Aqmola oblystyq bilim berý salasy qyzmetkerleriniń tamyz máslıhatynda qazaq, orys jáne aǵylshyn tilderin tereńdetip oqytý, barlyq kolledjderde birte-birte dýaldy oqytýǵa kóshý máseleleri kóterildi. Senator Sh.Erǵalıev oqytý sapasyn arttyrý qajettigine muǵalimder nazaryn aýdardy. Sondaı-aq, ol Keńes Odaǵynyń Batyry, akademık, qoǵam qaıratkeri Málik Ǵabdýllınniń 100 jyldyǵyna arnalyp Zerendi aýdanynda ótken «Aqyn halyqtyń batyr uly» atty oblystyq mádenı kópshilik is-sharaǵa qatysty. – El ersiz bolmaıdy. Sol eldiń eri Málik Ǵabdýllın bolsa, batyrdyń soǵystaǵy da, beıbit ómirdegi de ómiri búgingi jáne keler urpaqtarǵa árdaıym ónege bolyp qalary anyq, – dedi senator J.Erǵalıev óz sózinde.