Ispanııadan 21 medalmen oraldy

Ispanııanyń Madrıd qalasynda ótken osy eldiń ashyq birin­shili­ginde qazaqstandyq júzýshiler 10 altyn, 7 kúmis, 4 qola medal jeńip aldy. Sońǵy ýaqytta paralımpıadashylar arasynan sýyrylyp shyǵyp turǵany – júzýshiler. Dúnıejúzilik sýǵa júzý jarysynda Qazaqstannyń mańdaıy jarqyrap tur. Jaqynda ǵana Svetlana Kýchına jattyqtyrǵan qaraǵandylyq jastar Bashqurt­stannan 13 medaldy oljalap qaıtyp edi. Endi, mine, Madrıd qalasyndaǵy básekede de bizdiń qyz-jigitter namys­ty qoldan bermepti. 22 komanda baq synaǵan jarysta qazaqstandyqtar segizin­shi orynǵa taban tiregen. Alty sportshymyzdyń bir sapardaǵy oljasy – 21 medal. Jahanǵa jar salyp  súıinshi suramasaq ta, kóńilimizdi toǵaı­tarlyq qomaqty tabys. Osylaı bolatyn jóni de bar. О́ıtkeni, Ispanııa ashyq birinshiligine bizdiń eldiń júzýshileri saıdyń tasyndaı iriktelip bardy. Madrıdte el kólemindegi jarystyń júlde­gerleri emes, talaı álemdik doda­nyń tartysynda qoltyǵy sógilgen sańlaqtar synǵa tústi. Baıqap qarap, baǵamdaı berińiz. Basqa jetistikterin sa­namaǵanda, Ońtústik Koreıadaǵy HI Parazıada oıyndarynda bas júlde alǵan Ánýar Ahmetov, Zúlfııa Ǵabıdýl­lına, Dmıtrıı Lı jáne qola júldeger Sııazbek Dálıev attandy. Sondaı-aq, búkilálemdik múgedekter oıyndarynyń chempıony Natalıa Zvıagınseva men álem chempıonatynyń kúmis júldegeri Mıhaıl Eremenkony Ispanııa chempıo­natyna aparýǵa mamandar yqylasy tústi. Kórdińiz be, kileń birinen biri ótken kil júırikter tańdap alynǵan. Esesine senim aqtaldy. Madrıd tórinde Qazaq­stannyń kók baıraǵy on márte kóterildi. Ánýar sańlaq taǵy da aldyna qara salmapty. Ár súńgigeni bir altynǵa baǵalanǵan Ánýar bes altyn medalmen keýdesi jarqyrap keldi. Dastan KENJALIN, «Egemen Qazaqstan».