Dmıtrıı Sychev «Oqjetpeske» qashan aýysty?

ASTANA. 12 naýryz. Qazir bul jaıt otandyq jankúıerlermen qatar reseılik mamandardyń da qyzyǵýshylyǵyn týdyrýda. Negizi Sychevtiń Qazaqstanǵa aýysý múmkindigi jaıynda aqpar apta buryn tarady. Degenmen, naqty málimet áli jarııalanǵan joq. Al Germanııanyń belgili transfermarkt.de saıty Reseı fýtbolshysyn «Oqjetpestiń» sapyna qosyp qoıypty. Bul týraly egemen.kz habarlady. Olardyń aıtýynsha, Sychev kókshetaýlyq komandaǵa qarasha aıyna deıin jalǵa berilgen. Aýysym quny 500 myń evrony quraıdy. Degenmen, «Oqjetpestiń» bas jattyqtyrýshysy Vladımır Mýhanov ázirge naqty esh nárse aıtqan joq. Tek komandanyń reseılik fýtbolshyǵa qyzyǵýshylyq bildirgenin rastady. Keshe el chempıonatynyń ekinshi týrynda «Oqjetpes» Qyzylordada jergilikti «Qaısardy» jeńdi. Oıynnan keıingi baspasóz máslıhatynda Mýhanov Sychev týraly: «Bizdiń komandanyń aýysym týraly qyzmeti Dmıtrıı Sychevke qyzyǵýshylyq bildirgeni ras. Alaıda, áli de bolsa bul másele óz sheshimin tapty deı almaımyn. Jasyratyny joq, Sychevtiń bizge kelý-kelmeýi týraly men de naqty esh nárse bilmeımin. Sebebi, bul máseleniń keıbir derekteri men úshin qupııa. Kelissózder tym uzaqqa sozylyp ketti. Eger fýtbolshy bizdiń qatarǵa qosylsa, eki tarap úshin de tıimdi bolar edi», – dedi. Sondaı-aq, reseılik maman qandaı jaǵdaı bolsyn, komandaǵa shabýylshynyń kerek ekenin aıtty. Bul jóninde ol: «Bizge eki shabýylshynyń ózi azdyq etedi dep oılaımyn. Ishki birinshilikte joǵary nátıje kórsetý úshin keminde úsh shabýylshy kerek. Degenmen, bul máseleni maýsymaralyq úziliske qaldyratyn shyǵarmyz», – dedi. Aıta keter jaıt, keshe el chempıonaty aıasynda Aqtóbede ótken «Aqtóbe» men «Atyraý» arasyndaǵy oıyndy Sychev stadıonnan tamashalady degen aqparat tarady. Desek te, bul habardy komanda ókilderi ázirge rastaǵan joq. Dmıtrıı Sychev búginde Máskeýdiń «Lokomotıvine» tıesili oıynshy. Kezinde Fransııanyń «Marsel» komandasynda da dop tepken Reseıdegi bedeldi fýtbolshylardyń biri. Elaman Qońyr. Derek: egemen.kz. Sýret: transfermarkt.de.