ATYRAÝ. 25 mamyr. Atyraýdaǵy Nazarbaev zııatkerlik mektebin bitiretin alǵashqy 176 túlek sońǵy qońyraý saltanatyna qatysty. Bul týraly egemen.kz tilshisi habarlady.
Budan eki jyl buryn, ıaǵnı, 2013 jyldyń qyrkúıeginde ashylǵan erekshe bilim ordasy hımııa-bıologııa baǵytynda bilim beredi. Erekshe deýimizdiń birneshe sebebi bar. Aldymen aıtarymyz, munda «myńnan tulpar, júzden júırik» degendeı, eń talantty shákirtter oqıdy. Osy oqý ordasyna qabyldanýǵa ótinish bergen 2 978 oqýshynyń árqaısysy áýeli eki kezeńnen turatyn pándik testileý synaǵyn tapsyrdy. Sol synnan joǵary ball jınaǵan oqýshylar arasynda konkýrstyq irikteý ótkizildi. Sóıtip, Elbasy Nursultan Nazarbaevtyń «О́rken» granty barlyq synnan súrinbeı ótken 697 oqýshyǵa berildi.
Ekinshiden, bul bilim ordasynda dáris beretin ustazdar da konkýrstyq irikteýden ótkizildi. Muǵalimderdiń biliktiligin jete zerdelegen konkýrstyq komıssııa uıǵarymymen 74 ustaz erekshe mekteptiń daryndy shákirtterine dáris berý quqyǵyn ıelendi. Olardyń arasynan 33 muǵalim úsh deńgeıli bilim jetildirý kýrsynan ótti. Al «Bolashaq» baǵdarlamasynyń tórt túlegi Nazarbaev ýnıversıtetiniń bazasynda bir jyldyq kýrsta bilimin odan ári shyńdapty.
Úshinshiden, mundaǵy pándik dárister tek qazaq jáne orys tilinde ǵana emes, sonymen birge, aǵylshyn tilinde de júrgiziledi. Sol sebepten, ár ustazdyń aǵylshyn tilin bilýine basa kóńil bólinip, tipti, AQSh, Ulybrıtanııa, Rýmynııa, Irlandııa jáne Ońtústik Afrıka Respýblıkasy sekildi shet memleketterden joǵary sanatty birneshe ustaz shaqyrtylǵan. Sondaı sheteldik mamannyń biri Hasan Sabıg shákirtterge bıologııa páninen aǵylshyn tilinde dáris júrgizedi.
Nazarbaev zııatkerlik mektebiniń materıaldyq-tehnıkalyq bazasynyń jaraqtandyrylýyna toqtalsaq, ózge mektepterden oq boıy ozyq turatyndyǵymen erekshelenedi. Sebebi, munda bir mezgilde 720 shákirttiń oqıtyndyǵy óz aldyna, bilim ordasyndaǵy 60 kabınettiń barlyǵy da kompıýter jáne ınteraktıvti taqtamen qamtylǵan. Budan ózge, oqýshylardyń derbes jumys jasaýy úshin 650 noýtbýk ornatylyp, 15 tildik kabınettiń árqaısysynda on oqýshydan otyrýǵa laıyqtalǵan. Bul mektep hımııa-bıologııa baǵytynda bolǵandyqtan, ásirese, nanotehnologııa, bıotehnologııa kabınetteri oqýshylardyń ǵylymmen tereńirek aınalysýyna mol múmkindik beredi. Sonymen birge, robot tehnıkasy kabıneti de daryndy órenderdiń oı ushqyrlyǵyn jetildire túsýine septigin tıgizetini daýsyz.
Bilim ordasynyń kitaphanasy baı, sporttyq alańdaryna oqýshylardyń qaýipsizdigin saqtaıtyn arnaıy geterogendik jabyn tóselip, munda sporttyń birneshe túrimen shuǵyldanýyna jol ashylyp otyr. Al alys aýyldardan kelgen shákirtter úshin ashylǵan jataqhananyń da jabdyqtalýy kórgen jannyń kóńiline qýanysh uıalatady.
Aıta berse, Nazarbaev zııatkerlik mektebiniń ereksheligi kóp. Osy oraıda, munda synyp jetekshisi bolmaıdy eken. Ár synyptyń óz kýratory bar. «Bilim – ınemen qudyq qazǵandaı» ekenin tereń sezinip, biliktilikpen, bilimdilikpen aldan kórinýge umtylǵan Nazarbaev zııatkerlik mektebiniń ustazdary men shákirtteri erekshe úlgidegi bilim ordasyn maqtan tutady.
Atyraýdaǵy Nazarbaev zııatkerlik mektebiniń dırektory Aıdarbek Aıtpýkeshovtiń aıtýynsha, bıyl bilim ordasyn alǵashqy 176 túlek bitirgeli otyr. Búgin olar ózderi bilim alǵan altyn uıasyndaǵy sońǵy qońyraý saltanatyna qatysty. Olardyń arasynda 16 oqýshy «Altyn belgi», al 4 túlek «Úzdik attestat» alýǵa úmitker bolyp otyr.
Joldasbek Shópeǵul.
Derek, sýret:egemen.kz.
