«Saryarqa» «Ermakpen» bolǵan ekinshi oıynda ese jiberdi

ASTANA. 13 naýryz. Joǵary hokkeı lıgasynyń shırek fınalynda Qaraǵandynyń «Saryarqasy» ekinshi oıynda qarsylasyna ese jiberdi. Atalǵan saıysta Angarskiniń «Ermagymen» kúsh synasatyn qaraǵandylyqtar búgin 3:4 esebimen jeńilýge májbúr boldy. Bul týraly egemen.kz habarlady. Birinshi kezeńde jankúıerler gol kóre almady. Esesine, ekinshi kezeńniń alǵashqy mınýtynda «Saryarqanyń» qorǵaýshysy Ilıa Antonovskıı tamasha soqqysymen esep ashty. Keshe ótken alǵashqy oıynda da Ilıa esep ashyp, tartys sońyna deıin taǵy bir márte kózge túskenin aıta keteıik. Úzilisten shyǵa sala gol jiberip alǵan reseılikter dereý qarqyndaryn kúsheıtip, shabýyldaryn údete tústi. Nátıjesi de kóp kúttirgen joq. Kezekti shabýyldyń birinde aıdyn ıeleriniń oıynshysy tártip buzyp, kishi aıyppen jazalandy. Osy sátti utymdy paıdalana bilgen qonaqtar Roman Popovtyń arqasynda tarazy basyn teńestirdi. Leonıd Tambıevten tálim alatyn qaraǵandylyq hokkeıshiler oıynnyń 32-mınýtynda ekinshi shaıbany soǵyp, esepte taǵy da alǵa shyqty. Goldyń avtory – Oleg Lomako. Bul joly da «Saryarqa» basymdyqty uzaq saqtap tura almady. Lomakonyń golynan keıin arada 5 mınýt ýaqyt ótkende «Ermak» hokkeıshileri ekinshi ret esepti teńestirdi. Qaqpashy Vladımır Kovachtan aılasyn asyrǵan hokkeıshi Andreı Sherbov bolatyn. Úziliske deıin aıtarlyqtaı ózgeris bolǵan joq. Úshinshi kezeń teń jaǵdaıda órbidi. Qarsylastar bul kezeńde taǵy bir-birden gol soǵyp, esepti 3:3-ke jetkizdi. Aldymen, básekeniń 53-mınýtynda Aleksandr Torıanık «Saryarqany» alǵa shyǵarsa, oıynnyń aıaqtalýyna bir mınýt qalǵan kezde «Ermak» oıynshysy Vıtalıı Karamnov úshinshi ret tarazy basyn teń qyldy. Qos komanda da gol soqqan sátte oıynshy basymdyǵyn júzege asyrǵanyn aıta keteıik. Negizgi ýaqytta birin biri ala almaǵan qarsylastar jeńimpazdy anyqtaý úshin qosymsha kezeńge júgindi. Al bul synda qonaqtardyń mereıi ústem bolyp, tórtinshi shaıbalaryn soqty. Jeńis golynyń avtory – Denıs Davydov. Nátıjesinde, «Ermak» shırek fınaldyq básekeniń jalpy esebin teńestirdi. Eki oıynnyń qorytyndysy boıynsha esep 1:1. Endi qarsylastar 16-17 naýryz kúnderi Reseıdiń Angarsk qalasynda aıqasqa túsedi. Elaman Qońyr. Derek: egemen.kz. Sýret: hc-saryarka.com.