Shapaǵatty shara

Dúnıeni ustap turǵan – meıirim. Adamzat balasynyń boıyndaǵy osy bir qasıet bar jaqsylyqtyń, yrys-berekeniń tutqasy. Eger meıirimnen aıyrylsaq, onda dala taǵysynan esh aıyrmamyz qalmas edi. Jańa jyl qarsańynda Qyzylorda oblysynda ádemi bir shara ótti. Shapaǵatty shara der edik biz. Aımaqtaǵy júzge jýyq kásipker «Júrek jylýymen» atty qaıyrymdylyq aksııasyna qatysty. Bul sharanyń bıyl birinshi ret ótkizilip otyrǵanyn aıta keteıik. Osy bir meıirim-shapaǵattyń sharasynda áleýmettik jaǵynan az qamtylǵan 1200 otbasyna jalpy quny 7 mıllıon teńge turatyn azyq-túlik pen qajetti kıim-keshek úlestirildi. 22 GAZel avto­kó­ligine tıelgen zat jurtshylyqqa taratyldy. – Búgingideı qaıyrymdylyq aksııa­synyń ótkizilip otyrǵanyna biz óte qýanyshtymyz. Ásirese, mereke qar­sańynda kómek kórsetip jatqan barlyq azamattarǵa alǵysymyzdy aıtamyz. Men ózim otbasymmen jataqhanada turamyn. Múmkindigi shekteýli kishkentaı nemerem bar. Áleýmettik kómekti qajet etetin myńdaǵan otbasyna qolushyn sozý sharasy dástúrge aınalatynyna senemiz,– deıdi atalǵan aksııaǵa qatysýshy Janat Mahambetova. Búgingi sharaǵa arnaıy barǵan oblys ákimi Qyrymbek Kósherbaev aksııany ótkizýge atsalysyp, turmysy tómen otbasylarǵa qoldaý kórsetken barlyq azamattarǵa, isker adamdar men memlekettik, qoǵamdyq uıym ókilderine alǵysyn bildirdi. – Elbasy Nursultan Nazarbaev «Mem­leket pen bıznes ekonomıkalyq qana emes, áleýmettik máselelerdi sheshýde de áriptes bolýy tıis», degen bolatyn. Áleýmettik ádil­dik, teńdik, ózara syılastyq pen qam­qorlyq týraly nıetti tek qana memleket emes, azamattyq or­tanyń óziniń kóterýi qoǵamymyzdyń kemeldengendigin kórsetedi. Sondyqtan da bul quptarlyq jáne jan-jaqty qol­daýǵa turatyn bastama,– dedi Qy­rymbek Eleýuly. Aksııaǵa atsalysqan belgili kásip­kerler men halyq qalaýlylary, mem­lekettik qyzmetkerlerden shara aıasynda uıymdas­tyrylǵan arnaıy kómek jáshigine 3 mıllıon teńgege jýyq qarjy jınaldy. Al sharaǵa qatysqan múmkindigi shek­teýli azamattarǵa arnaıy bekitilgen avtokólikter azyq-túlikterin úıine deıin jetkizip berdi. Erjan BAITILES, «Egemen Qazaqstan». QYZYLORDA.