Tuńǵysh Prezıdent mýzeıine tartý

Jaqynda Astana qalasynda Aqmola oblysynyń mádenı ómirindegi erekshe oqıǵa boldy. Qazaqstan Respýblıkasynyń Tuńǵysh Prezıdenti mýzeıine oblystyń sımvoldyq «Tarıhı sandyǵy» tabys etildi. Bul shara Mádenıet jáne sport mınıs­tr­ligi men oblys ákimdiginiń qoldaýymen, Qazaq handyǵynyń 550 jyldyǵyna arnalǵan «Ǵasyrlar amanaty» respýblıkalyq aksııasy sheńberinde júzege asyryldy. Oblystyq mádenıet basqar­masynyń basshysy Sáýle Býrbaeva bul taǵylymdy is jyl boıy atqa­rylǵan úlken jumystyń qýa­nyshty qorytyndysy ekendigin atady. Merekelik jyldyń maýsym aıynda Kókshetaýda halyq­aralyq mýzeı-festıvali ótkizildi. Onda Italııa, Vengrııa, Reseı ǵalymdarynyń qatysýymen «Mý­zeı­ler jádigerlerindegi qazaq handyǵynyń tarıhy» atalatyn ǵylymı-praktıkalyq konferensııa uıymdastyryldy. Sol kúni elimizdiń barlyq mýzeı­leri qyzý qoldaǵan «Ǵasyr­lar amanaty» respýblıkalyq aksııa­sy jumysyn bastady. Aksııa barysynda oblysta joǵaryda atalǵan «Tarıhı sandyq» jabdyq­talyp, oǵan qazaq, orys, aǵylshyn tilderindegi kóp tarmaqty foto-beıne albom jáne tarıhı derekterge negizdelgen qysqa metrajdy fılm­der dıskileri toptastyryldy. Astana qalasy qaýymdas­ty­ǵynyń, Qazaqstan Respýblıkasy Parlamenti depýtattarynyń qaty­sýymen ótken «Tarıhı sandyq­tyń» tanystyrylymyna jı­nalǵandar Aqmola oblysy mýzeı­lerinde daıyndalǵan qysqa metrajdy fılmderge aıryqsha qyzy­ǵýshylyq tanytty. Mundaǵy belgili tarıhı tulǵalardy Shahmet Qusaıynov atyndaǵy oblystyq qazaq mýzykalyq-drama teatrynyń akterleri somdaǵan bolatyn. Sondaı-aq, Abylaı han, Úm­betaı jyraý jáne Qanaı bı beınelerine arnalǵan kórinister han ordasy – Býrabaıda, Bógenbaı batyr – Ereımentaýda, Aqan seri – Kókshetaý men Aıyr­taýda, tarıhı oqıǵalardy jań­ǵyrtýshy, jerles jazýshy Ilııas Esenberlın ózi týǵan At­basarda túsirilgeni tanymdyq arqaýdy kúsheıte túsedi. Qundy jádigerler qatarynda Abylaı han taǵy, Bógenbaıdyń dýlyǵasy, Saqqulaq bıdiń kilemi, Qanaı bıdiń saptaıaǵy, Aqan seriniń adalbaqany, Ilııas Esenberlın shyǵarmalarynyń qoljazbalary, qazaq handarynyń shejiresi jáne basqa dúnıeler bar. Baqbergen AMALBEK, «Egemen Qazaqstan». Aqmola oblysy.