Bizdiń tańdaýymyz – taǵattylyq

Elbasynyń «Kópultty bolý – bizdiń baqytymyz» deýiniń astarynda úlken maǵyna jatqandyǵyn keıbir túsinigi tómen, túsinip turyp moıyndaǵysy kelmeıtin adamdar árqıly aıtyp, ár qıyrǵa tartady. Saqalyna shirkeı uıalap, kún-tún bes qarýyn asynyp, at ústinde júrgen ata-babamyzdyń armany eshkimge táýelsiz, óz aldyna bólek el bolý edi. Sol úshin jan-jaǵynan tóngen jaýlaryna qarsy turdy, shabyssa shabysty, jeriniń bir pushpaǵyn jat tabany baspas úshin qıdalasty. Ártúrli náýbetterdi bastan ótkerdi. Tarıhy qalyń, oqýlyǵy jup-juqa halqymyz bodandyqtyń qasiretin tartýdaı tartty. Tyń ıgerý kezinde qazaq óz eli, óz jerinde 30 paıyzǵa jetpeı qaldy. Táýelsizdik alar tusta da kósegemizdiń kógerip turǵany shamaly edi. Keshe ǵana dúnıeden ótken abyzymyz, qazaqtyń sózin ustaǵan marǵasqamyz Ábish Kekilbaev Ońtústikke kelgen saparlarynyń birinde «Biz Táýelsizdik alǵan tusta halqymyzdyń sany 40 paıyzdan endi asqan edi. Elbasymyzǵa rahmet. Qazaqstanda turatyn ulttar men ulystardyń ókilderin bir maqsat, bir múddege biriktirip, memleketimizdi bólshekteýden aman saqtap qaldy», degendeı oı aıtqan bolatyn. Elbasynyń «Ult Jospary – qazaqstandyq armanǵa bastaıtyn jol» maqalasyndaǵy «Reformalar tabysy – ult birligine bastar jol» bóliminen osy aqıqatqa taǵy da kóz jetkize tústik. Qazaqstandy moıyndaı qoımaıtyn, bilgen jaǵdaıda ózin bıik ustaǵysy keletin talaı myqty memleketter ulttar arasyndaǵy beıbitshilik pen kelisimniń qanshalyqty mańyzdy ekendigine kezinde mán bermeı, qazir qyrǵı-qabaq soǵys jaǵdaıynda otyr. Memleket basshysy: «Búginde álemniń barlyq damyǵan elderi ózderiniń jańǵyrtýshy jobalaryn burynnan qalyptasqan birtektilik negizinde júzege asyrady. Qazaqstanǵa keler bolsaq, biz de osy jolǵa tústik. Álemdik tájirıbe kórsetip otyrǵandaı, birtektilik pen birtutastyq salasynda ámbebap standarttar men usynymdamalar joq. Álemde birde-bir el osy saladaǵy syn-qaterlerge daıyn resepterge, modelder men jaýaptarǵa ıe emes. Álemde áli eshkim de ómirdiń osy salasyn ólsheýge qabiletti qandaı da bir jalpyǵa ortaq birtektilik pen birtutastyq ındeksin nemese formýlasyn oılap tapqan joq. Sonymen birge, bizdiń birtektilik pen ult birligi salasyndaǵy jumystarymyzdyń túpki maqsattary nemese tehnokrattyq túrde beınelegende, kútiletin nátıjeler – EYDU elderimen ortaq. Bizdiń jolymyz – ol birlik joly jáne azamattyq birtektilik negizinde ultty dáıektilikpen qalyptastyrý joly. Qazaqstandyqtardyń azamattyq birtektiligi men birtutastyǵyn ny­ǵaı­týǵa baǵyttalǵan TО́RTINShI REFOR­MANYŃ máni de dál osynda», dedi. Memleket basshysynyń paıymdaýlaryna Qazaqstan halqy tolyqtaı kelisip, birlikti nyǵaıtý baǵytynda jumys jasap keledi. Qazaqstan – bolashaǵy aıqyn, uly maqsattardy júzege asyrýǵa qaýqary jetetin, armanyn oryndaı alatyn memleket. Nursultan Ábishuly Birikken Ulttar Uıymynyń tórinde qazaq tilinde baıandama jasaǵanda osy memlekettiń bir patrıot azamaty retinde qatty tolqyǵanbyz. Keshe ǵana ózgege bodan bolyp, esik kózinde júrgen, ishindegi oıyn ashyp aıta almaıtyn, buratana sanalǵan ulttyń ókili álemdik minbede qazaqtyń myqty halyq ekendigin tanytyp, abyroıymyzdy asqaqtatty. Arman oryndalady eken. Biz maqsattarymyzǵa bir úıdiń balasy, bir qoldyń salasyndaı birligimizben jetemiz. Qudaıbergen ERJAN, Ońtústik Qazaqstan oblystyq máslıhatynyń hatshysy. ShYMKENT.