Chehııanyń premeri taǵy da hakerlerdiń qurbanyna aınaldy

ASTANA. 8 qańtar. Chehııanyń premer-mınıstri Bogýslav Sobotkanyń elektrondy poshtasyna shabýyl jasaldy. Hakerler ondaǵan hattardy qoldy etti. Bul týraly TASS aqparat agenttigine silteme jasaǵan egemen.kz tilshisi habarlady. «Negizinen bıliktiń kóshi-qon máselesi jóninde bergen habarlamalary urlanǵan. Artynsha, bul aqparattar sheteldik saıttardyń birinde jarııalanǵany málim boldy», – dep habarlaıdy Chehııa radıosy. Urlanǵan málimetterdiń ishinde ıpotekalyq nesıeni tólegeni, partııadaǵy jáne úkimettegi áriptesterimen kelissózderi, kóshi-qon daǵdarysy, mınıstrler quzyretine qarasty ekonomıkalyq máseleler men kadrlyq suraqtar jaıly aqparattar bar. Oqıǵa barysyn jergilikti polısııa qyzmetkerleri tekserý ústinde. Bogýslav Sobotkanyń ózi bul jaǵdaıǵa suhbat berýden bas tartty. Aıta keteıik, Chehııa premer-mınıstri sońǵy bir aı ishinde osymen ekinshi márte hakerlerdiń qurbanyna aınaldy. Jeltoqsan aıynda Twitter áleýmettik jelisindegi jeke paraqshasyna shabýyl jasalyp, orynsyz jazbalar jaryq kórdi. Olar premer-mınıstrdiń atynan neoultshyldyqqa oń kózqarasta ekendigi, elin satyp ketken bosqyndarǵa qarsy kúresý kerektigi, el prezıdentine til tıgizgeni jóninde birneshe habarlamalar taratqan. «Belgisiz bireýlerdiń mundaı áreketke barǵany úshin ústerinen qylmystyq is qozǵalady. Áleýmettik jelide shyqqan jazbalar Bogýslov Sobotkanyń alǵa qoıǵan saıasatymen jáne kózqarasymen múldem sáıkes kelmeıdi», – deıdi mınıstrler úıiniń baspasóz hatshysy Martın Aıer. Al bul rette úkimet basshysy: «Meniń jeke paraqshama neoultshyldar shabýyl jasaǵan bolsa, óz isimdi oıdaǵydaı atqaryp júrgenimniń aıqyn dáleli», – dedi. Aıan Ábdýálı. Derek: TASS. Sýret: 112.ua.