Qazaqstannyń Qarýly Kúshterinde jańa oqý jyly bastaldy

ASTANA. 11 qańtar. Qazaqstan Respýblıkasynyń Qarýly Kúshterinde jańa oqý jyly bastaldy. Oqý jyly jaýyngerlik saıystyń «Máńgilik el» tuǵyry – Qýatty Armııa!» atty uranymen ótedi. Bul týraly egemen.kz tilshisi habarlady. Bıylǵy jyly qazaqstandyq armııanyń negizgi kúsh-jigeri jaýyngerlik ázirliktiń joǵary dárejesine keltirý kezinde jeke quramnyń mashyǵyn, is-qımyldaryn jetildirýge, eldi mekender men taýly jerde urysty júrgizý úshin bólimshelerdiń ázirligin arttyrý, basqarý júıesin jetildirý jáne áskerı qyzmetshilerdiń dene daıarlyǵyn shyńdaýǵa baǵyttalady. Sonymen qatar ári qaraı jaýyngerlik daıarlyqty uıymdastyrý, áskerlerdi basqarý jáne áskerlerdi materıaldyq-tehnıkalyq qamtamasyz etýdiń tıimdi júıesin qurý jaqsaratyn bolady. Osy jyly jaýyngerlik daıarlyqty jetildirý sheńberinde qazaqstandyq áskerı qyzmetshilerdiń qatysýymen birqatar halyqaralyq oqý-jattyǵýlar men saıystardy ótkizý josparlanýda. Qurlyq áskerlerinde negizgi kúsh-jiger qazirgi zamanǵy qaqtyǵystar men qarýly shıelenisterdiń sıpatyna sáıkes áskerı bólimder men quramalardyń jaýyngerlik jáne jumyldyrý ázirligin odan ári arttyrýǵa, jeke qurammen jumys jasaý sapasyn arttyrýǵa, áskerı tártip pen quqyqtyq tártipti nyǵaıtýǵa shoǵyrlandyrylady. Áýe qorǵanysy kúshterinde jańa oqý jylyna qoıylǵan tapsyrmalar jaýyngerlik ázirlik pen jaýyngerlik qabilettiliktiń joǵary deńgeıin ustap turý, barlyq sanattaǵy áskerı qyzmetshilerdiń kásibı jáne jeke daıarlyǵyn arttyrý, qarapaıym jáne kúrdeli meteojaǵdaılarda (kúndiz jáne túnde) ushý quramynyń pılotajdaý sheberligin jetildirý, áýe urysyn júrgizý, áýe jáne jerústi nysanalar boıynsha jaýyngerlik qoldaný, sondaı-aq áýe shabýylyna qarsy qorǵanystyń jalpy júıesinde kezekshi kúshter men quraldardyń jaýyngerlik ázirligin arttyrý maqsatynda jaýyngerlik kezekshilik júıesin jetildirý bolyp tabylady. Áskerı-teńiz kúshteriniń 2016 jylǵy tapsyrmalary QR QK ÁTK bas qolbasshysynyń basqarmasynda jaýyngerlik kezekshiliktiń sapaly túrde atqarylýyn uıymdastyrý, QR QK ÁTK korablderiniń 2016 jylǵy Armııa oıyndaryna qatysýy jóninde áskerı basqarýdyń joǵary turǵan organdarymen ózara is-qımyldy uıymdastyrý, Áskerı-teńiz kúshteriniń qurylýy men damýynda tájirıbe almasý úshin Kaspıı mańyndaǵy memleketterdiń ÁTK-men áskerı-tehnıkalyq yntymaqtastyq aıasyndaǵy is-sharalardy uıymdastyrý bolyp tabylady. Dastan Kenjalın. Derek, sýret: Qazaqstan Respýblıkasy Qorǵanys mınıstrligi.