Mańǵystaýda jol boıynan sábıdiń óli denesi tabyldy

AQTAÝ. 18 qańtar. Mańǵystaýda jol boıynan sábı denesi tabyldy. Bul týraly tumba.kz saıtyna silteme jasaǵan egemen.kz tilshisi habarlady. 17 qańtar kúni saǵat 17:00 shamasynda Beıneý aýdany Sarǵa aýylynyń turǵyndary qoı baǵyp júrip, Atyraý-Aqtaý respýblıkalyq mańyzy bar avtokólik joly boıynan, atalǵan aýyldan 900 metr qashyqtyqtaǵy qoqystar shetinde jatqan aýzy jabyq karton qorapty kózderi shalady. Býylyp-túıilgen qorapty ashyp qarasa, ishinen sábıdiń óli denesi tabylǵan. Kýágerlerdiń aıtýynsha, balanyń aýzyna áıel adamnyń kapron kolgotkıi tyǵylǵan jáne mańynda áıel adamnyń kıimderi bolǵan. Turǵyndar oqys oqıǵa týraly dereý quqyq qorǵaý oryndaryna habarlap, polıseıler sábıdiń denesin máıithanaǵa jóneltti. Sonymen qatar, náreste qyz bala denesine dárigerlik saraptama jasalyp, onyń anasy anyqtaldy. Ol 1978 jyly týylǵan áıel bolyp shyqty. Kelinshek balanyń óli týylǵandyǵyn aıtyp bergen. Qazirgi tańda tergeýshiler istiń mán-jaıyn anyqtaýda. Gúlaıym Shyntemirqyzy. Derek: tumba.kz. Sýret: informing.ru.