Jambyl oblysynda sábıdiń ólimine qatysty 4 qylmystyq is qozǵaldy

TARAZ. 19 qańtar. Jambyl oblysy, Talas aýdanynda kólikte bosanǵan qyz júktiligin korsetpen jasyrǵany anyqtaldy. Bul týraly Jambyl oblystyq prokýrorynyń kómekshisi Ermek Qýanyshev habarlady. Tergeý qorytyndysyna sáıkes, muǵalimder bosanýǵa shaq qalǵansha mektepke kelip júrgen óz oqýshysynyń júktiligin bilmegen. Qyz jańajyldyq is-sharalarǵa qatysyp, horda án salǵan. Qysqy kanıkýldardan keıin, bosanýyna bir kún qalǵanda, 12 qańtarda sabaqqa barǵan. Keıin onyń óz júktiligin jasyrý úshin korsetpen kelip júrgeni anyqtaldy. Ony asyrap alǵan ata-anasy maldy aýylda bolyp, onynshy synypta oqıtyn qyzynyń júkti ekenin bilmepti. Jambyl oblystyq densaýlyq saqtaý basqarmasynyń basshysy Erlan Masalımov qyzdyń 2015 jyldyń sáýir aıynda skrınıngtik tekserýden ótkenin aıtady. Biraq júktiliktiń belgisi baıqalmaǵan. Kámeletke tolmaǵan qyzdyń oqıǵasynan keıin Talas aýdandyq Úsharal orta mektebiniń dırektory óz qalaýymen qyzmetinen ketken. «Mektep dırektorymen birge jumystan ketý týraly aryzdy Talas aýdandyq bilim bóliminiń jetekshisi Sanat Áshirbekov te jazdy. Sonymen qatar, dırektordyń oqý isi jónindegi orynbasary jáne synyp jetekshisi jumystan bosatylady», deıdi Ermek Qýanyshev. Al, oblys basshysy Kárim Kókirekbaev apparat jıynynda bul iske qatysy barlardyń eshqaısysynyń jazadan qutylmaıtynyn aıtty. Oblystyq bilim basqarmasy Talas aýdanynyń ákimine jaýapty tulǵalarǵa qatysty qatań sharalar qabyldaýy úshin arnaıy hat joldaǵan. «Biraq áli kúnge deıin eshqandaı jaýap joq. Bizdiń bilim basqarmasy aýdandyq bilim bólimderiniń basshylaryn jazaǵa tartalmaıdy. Ondaı quqy joq. Sondyqtan tek usynys bere alady», deıdi bul jóninde Jambyl oblystyq bilim basqarmasynyń basshysy Sulýshash Qurmanbekova. Esterińizde bolsa, bul oqıǵa 13 qańtarda tańǵy ýaqytta bolǵan. Áıel óziniń asyrap alǵan júkti qyzyn alyp, kórshisiniń kóligimen Tarazǵa jolǵa shyǵypty. Jolda qyz tolǵatyp, ul balany týyp alǵan. Osydan keıin Aqkól aýylyna kireberiste oqýshynyń ógeı sheshesi jańa týǵan sábıdi laqtyryp jibergen. Alǵan jaraqatynan sábı oqıǵa ornynda shetinep ketti. Kólik júrgizýshisi bul oqıǵany kórip, tańǵalǵanyn jáne bul qylmysqa qatysynyń joqtyǵyn aıtyp otyr. Keıin sábıdiń ákesi delingen er adam ustaldy. Ol Qarataý qalasyndaǵy kolledjde oqıdy eken. Ol da Talas aýdandyq Úsharal aýylynyń turǵyny. Eldosov bastapqyda úılenemin dep, keıin júkti qyzdan bas tartqan. Jalpy asyrap alǵan anaǵa, júrgizýshige jáne sábıdiń ákesine qatysty tórt qylmystyq is tergelip jatyr. Oralhan Dáýit. Derek, sýret: egemen.kz