Jambylda avtobýsty mas bolyp aıdaǵan júrgizýshi ustaldy

TARAZ. 25 qańtar. Respýblıkalyq «Avtobýs» jedel-profılaktıkalyq is-sharasynda Taraz qalalyq ishki ister departamenti jol-patrýldik qyzmeti №37 baǵyt boıynsha jolaýshy tasymaldap júrgen avtobýstyń eki júrgizýshisin ustady. Bul týraly egemen.kz tilshisi habarlady. Taraz qalalyq jol-patrýldik qyzmeti batalonynyń komandıri, polısııa maıory Baqytjan Joldasbekovtiń aıtýyna qaraǵanda, «Saıahat-99» JShS-ne tıesili bul avtobýs shopyrlarynyń joldama qaǵazdary osy baǵytqa sáıkes kelmegeni bylaı tursyn, kóliktiń osy túrin júrgizýge eshqandaı qujattary bolmaı shyǵypty. Eń sumdyǵy, ózin óte dóreki ustaǵan 20 jastaǵy júrgizýshini medısınalyq tekserýden ótkizgende, dárigerler oǵan esirtkige eltigen degen qorytyndy bergen. Erteńinde taǵy da 27 jastaǵy avtobýs júrgizýshisi ustaldy. Onyń da kólik júrgizýge quqyq beretin eshqandaı qujattary bolmaı shyqty. Jergilikti polısııa qyzmetiniń málimetine qaraǵanda, osy «Avtobýs» is-sharasy kezinde 649 jol erejesin buzý faktileri anyqtalypty. Onyń ishinde júrgizýshiniń rýlde ketip bara jatyp uıaly telefonmen sóılesýi, jol boıynda qaýipti manevr jasaý jáne jyldamdyqty arttyrýy óte kóp kezdesken. Osy tusta taǵy bir aıtary, jyl basynan beri Jambyl oblysynda oryn alǵan jol-kólik oqıǵalarynyń toǵyzynda kináli jaq oqıǵa ornynan qashyp ketipti. Oralhan Dáýit. Derek, sýret: egemen.kz