ALMATY. 25 qańtar. Megapolıs qalanyń mádenı ómirindegi aptanyń alǵashqy kúni erekshe bastaldy. Dúısenbi kúni tanymal qalamger Tursynjan Shapaıdyń «Kúlki jáne kóz jasy» kitabynyń tusaýkeseri ótip, oǵan shahardaǵy ádebıettanýshylar men belgili pýblısıster, BAQ jetekshileri men qalamy júırik jýrnalıster qatysty. Jıynnan belgili ǵalymdar da tabyldy. Bul týraly egemen.kz tilshisi habarlady.
Kópten kútken kitaptyń tusaýkeser rásimin «El» prodıýserlik ortalyǵynyń dırektory Ǵalym Dosken jáne «Qazaq ádebıeti» gazetiniń bas redaktory Jumabaı Shashtaıuly jasap, jazý ónerine qatysty oılaryn ortaǵa saldy.
Rýhanı basqosý turǵysynda ótken kitaptyń tusaýkeserinde Tursynjan Shapaıdyń sózine jazylǵan ánder oryndalyp, ádebı keıipkerleri sóz aldy. Ramazan Stamǵazıev, Bekjan Turys, Ultý Qabaeva syndy ónerdiń bel balalary shyǵarmashylyq bas qosýdyń salmaǵyn arttyrdy. Tanymal akter Asqar Naımantaev jazýshynyń shyǵarmasynan «Qazaqpen saýdalasý» úzindisin oqydy.
Atalmysh kitap «Aqjúnis» baspasynan shyqqan tuńǵysh kitap ekenin aıta ketý lázim. Osynaý jobaǵa muryndyq bolǵan «Aqjúnis-Astana» jýrnalynyń bas redaktory Sáýle Ábedınova «Kúlki jáne kóz jasy» kitaby 2 myń danamen jaryq kórgenin, suranys ósken saıyn taralymy da óse beretindigin aıtty.
«Kúlki jáne kóz jasy», «Jazý», «Bir mysqal», «... jáne bir esse» atty tórt taraýdan turatyn kitap qazirdiń ózinde erekshe oı oralymdarymen, tiliniń shuraılylyǵy, sóziniń salmaqtylyǵy, máseleleriniń kókeıkestiligimen oqyrmandaryn eleńdetip otyr.
Aınash Esalı.
Derek, sýret: egemen.kz.
