Qazaqstanda daǵdarys saldarynan kottedjder bólshektenip satylýda

ASTANA. 28 qańtar. Ekonomıkalyq daǵdarys Qazaqstandaǵy turǵyn úı naryǵyna aıtarlyqtaı salqynyn tıgizýde. Sonyń saldarynan endi kottedjder men taýnhaýstar bólshektenip satylýda. Bul týraly profinance.kz saıtyna silteme jasaǵan egemen.kz tilshisi habarlady. Naqty aıtqanda, joǵaryda atalǵan úılerdiń ıeleri menshigin tutas kúıinde sata almaıtyndaryna kózderi jetip, ony birneshe páter etip, bólip satýǵa bel baılaǵan. Tipti, ár páterdiń satyp alýshysyna tıisti tehnıkalyq tólqujat ta beriledi eken. Qazirgi tańda jyljymaıtyn múlik jarnamasyna arnalǵan saıttarda osyndaı habarlandyrýlardyń 100-den astam túri ilingen. Olardyń kóbi eki qabatty, aýdany 170-ten 300 sharshy metrge deıingi úıler. Ieleri atalǵan baspanalardy 2-6 páterge bólip satýda. Keı jaǵdaıda jertóle qabattary da turǵyn jaı esebine qosylǵan. Úı ıeleri jyljymaıtyn múliktiń ár sharshy metrin shamamen 600 dollarǵa baǵalap otyr. Mundaı kottedjderdiń deni Almaty qalasynda satylyp jatqanyn atap ótken jón. Osy salada qyzmet kórsetetin fırma ókiliniń aıtýynsha, bastapqyda satýshylar úıdi sol kúıinde satýǵa qoıǵan. Alaıda, ol kezde tutynýshy tabý óte qıynǵa soqqan eken. Nátıjesinde daǵdarysqa qarsy satýdyń jańa formatyn engizýge májbúr bolǵan. Elaman Qońyr. Derek: profinance.kz. Sýret: silkins.com.