Avstralııalyq terrorlyq áreketke kengýrýdi paıdalanbaq boldy

ASTANA. 28 qańtar. Avstralııada «Islam memleketi» lańkestik uıymynyń múshesi kengýrýdi paıdalanyp terrorlyq áreket jasamaq bolǵan. Bul týraly TASS aqparat agenttigine silteme jasaǵan egemen.kz tilshisi habarlady. О́tken jyly lańkestik áreket jasamaq boldy degen aıyppen tutqyndalǵan 19 jastaǵy avstralııalyq Sevdet Ramadan Besım Melbýrn soty aldynda jaýap berýde. Oǵan tórt birdeı bap boıynsha, onyń ishinde polısııa qyzmetkerin óltirip, basyn shaýyp tastamaq bolǵan degen aıyp taǵylǵan. Sot kezinde aıyptaýshy tarap iske qatysty taǵy bir qyzyqty jaıtty habarlady. Quqyq qorǵaý organdarynyń materıaldaryna qaraǵanda, kúdikti lańkestikti qoldaıtyn jaqtastarymen ınternette lańkestik áreket kezinde kengýrýdi paıdalaný týraly jospardy talqylaǵan. Ol kengýrýdiń ishine jarylǵysh zatty baılap qoıyp, ań terisine «Islam memleketi» lańkestik tobynyń belgisin salyp qoımaq bolǵan. Osylaısha kúdikti ańdy polısııa qyzmetkerleriniń janyna qoıa berip, jaryp jibergisi kelgen. Sevdet Ramadan Besım bul qylmysty lańkestik uıym nasıhatynyń áserine erip josparlaǵan degen joramal da bar. Sebebi, bul topqa ıslam oqýlaryn dinı turǵydan túsindirý tán bolyp keledi. Taǵylǵan aıyptarǵa jaýap bere otyryp sottalýshy ózin kinásiz dep sanaıtynyn málimdegen. Esterińizge sala keteıik, Sevdet Ramadan Besım ótken jyly 18 sáýirde Melbýrnniń ońtústiginde polısııa qyzmetkerleri ótkizgen lańkestikke qarsy is-shara kezinde tutqyndalǵan bolatyn. Ol kezde bes adam kúdikke ilingen. Quqyq qorǵaý organdarynyń derekterine sáıkes, onyń ekeýi Avstralııada 25 sáýir kúni soǵys pen áskerı qaqtyǵystar kezinde qaza bolǵan ardagerlerdiń qurmetine oraı ótetin avstralııalyq-jańazelandııalyq áskerı korpýsy kúni lańkestik áreket jasamaq bolǵan. Elaman Qońyr. Derek: TASS. Sýret: AP Photo.