Saılaýaldy naýqan bastalyp ketti

Ońtústikte «Nur Otan» partııasynyń saılaýaldy shtaby ashylyp, jetekshisi bolyp partııanyń OQO fılıaly tóraǵasynyń birinshi orynbasary Berik Ospanov taǵaıyndaldy. Buqaralyq aqparat quraldary ókil­derimen ótken brıfıngte Berik Serikuly partııanyń kezekten tys XVII sezinde Parlament Májilisiniń depýtattaryna arnalǵan partııalyq tizim bekitilip, jańa saılaýaldy baǵdarlamanyń qabyl­danǵanyn taǵy da eske saldy. – «Nur Otan» partııasy bıliktegi basymdyqqa ıe jáne jaýapkershiligi mol saıası kúsh retinde óziniń saılaýaldy baǵdarlamasynda jańa úderisterge jaýap beretin jáne birlik, turaqtylyq pen jasampazdyqty qamtamasyz etýge baǵyttalǵan, Elbasy anyqtap bergen memlekettik mindetterdi júzege asyrý jónindegi alǵa qoıylǵan maqsattarǵa qol jetkizý úshin naqty mejelerdi belgiledi. Búgingi tańda partııada túr­li áleýmettik toptarǵa jatatyn tur­ǵyndarmen naqty is-qımyl jospary ázirlenip, shtabtyń kúntizbelik jospary bekitildi, – dedi ol. Oblystyq saılaýaldy shtabynda 62 múshe bar. Al aýdandyq, qalalyq shtabtarǵa 355 azamat kirip, saılaý ýchaskelerinde 3222 senimdi ókil jumys jasaı bastady. Shtabta úgit-nasıhat kezinde ótkiziletin barlyq sharalardy aqparatpen qamtamasyz etý úshin baspasóz ortalyǵy jumys isteıtin bolady. Shtab jumysynyń negizgi maqsaty – Parlament Májilisi men barlyq deńgeıdegi máslıhattar depýtattarynyń saılaýlarynda aıqyn jeńiske qol jetkizý. Baqtııar TAIJAN, «Egemen Qazaqstan». Ońtústik Qazaqstan oblysy.